Máis de 75 postos de artesanía, gastronomía e xoguetes, xunto con actuacións, xogos e obradoiros encherán as prazas do centro histórico
12 ago 2015 . Actualizado a las 10:41 h.Melide inaugurou onte a cuarta edición do Mercado Medieval, antesala das súas festas grandes, o San Roque.
Esta apertura foi ás 18 horas na praza do Convento do pobo, da man dunha actuación musical. A súa alcaldesa, Ánxeles Vázquez, acompañada polo grupo de goberno, deu unhas palabras para convidar a todos aqueles que así o desexen a participar no mercado coa indumentaria de época.
Melide aínda ten por diante dous días máis nos que o casco antigo se engalana e no que os melidenses se visten de medievais para gozar dun amplo abano de actividades. Máis de 75 postos de artesanía, gastronomía e xoguetes, xunto con actuacións musicais, xogos e obradoiros de oficios encherán as diferentes prazas do centro histórico da vila.
Unha das novidades deste ano é que os cativos que participan nos campamentos urbanos, un total de 85, integraranse tamén no mercado, coas roupas propias da Idade Media e facendo actividades a pé de rúa.
O mercado é boa unha oportunidade para que Melide ensine o seu patrimonio artístico e cultural, e así será aproveitada.