Regreso en Serramoura: «Micaela vén con ganas de vinganza»

Melania Cruz interpreta a Micaela Morais, un dos personaxes máis inquietantes de «Serramoura»


redacción / la voz

O regreso de Micaela foi unha das grandes sorpresas da temporada.

-Os espectadores de «Serramoura» quedaron impactados co regreso de Micaela. Como viviches ese momento?

-Empezoume a escribir xente preguntando se volvía a Serramoura. Eu non dicía nada porque hai que manter a expectación ata o último momento [ri]. O regreso á serie vivino sobre todo con moita sorpresa pola miña parte, porque é unha personaxe que a min me deu moitas alegrías, aínda que a Serramoura non, pero con moita satisfacción de ver como se recibe a volta, porque o público está como moi entregado a ese regreso e querendo saber o que vai facer agora Micaela despois de tanto tempo sen saber dela.

-Quen é Micaela?

-Micaela é unha muller da Estrada, pero que ten un pasado moi escuro. Estivo durante moito tempo no cárcere e é a xefa dun clan da mafia rusa. É unha muller que está moi afeita a levar o mando das cousas e controla a unha serie de persoas que son bastante perigosas para Serramoura ou para calquera vila.

-Con que sorpresas volve Micaela Morais a «Serramoura»?

-Micaela vai traer cousas moi inesperadas, porque, se antes xa vimos certas caras de Micaela, tanto no club coma no cárcere, o que vai pasar agora a xente non o espera en absoluto, porque eu tampouco o esperaba [ri]. Creo que vai ser algo sorprendente, que vai remover moito aos veciños de Serramoura, e van ter que asumir este regreso como poidan.

-Como te enfrontas a unha personaxe como Micaela?

-Para min é unha personaxe moi divertida de facer porque permite que, como actriz, imaxines moitas posibilidades de xogo. Facer unha personaxe que está tan afastada da realidade e que fai as cousas segundo ela cre que é o mellor, e sen preocuparse das consecuencias que poidan ter, é moi entretido.

-Os espectadores atoparán algunha diferenza entre a Micaela do pasado e a de hoxe?

-Eu creo que si. Non lle sentou ben estar este tempo no cárcere, polo que Micaela vén con ganas de vinganza, e aí quedo, para non facer algún descubrimento, que é mellor que os espectadores o vexan por si mesmos.

-Ademais de verte en «Serramoura», tamén podemos atoparte na montaxe «O empapelado amarelo». Que nos podes contar deste espectáculo?

-É unha proposta moi íntima e próxima, na que o público vai estar moi preto. É unha viaxe no universo dunha persoa que se atopa nun momento moi delicado, e acepta unha cura de repouso pechada nun cuarto de paredes amarelas. Fala do tránsito de gañar conciencia para liberarse de algo que a está oprimindo. Estreamos en Ourense o vindeiro 27 de xaneiro, e despois imos de xira e estaremos en Santiago, en Narón e noutras cidades galegas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Regreso en Serramoura: «Micaela vén con ganas de vinganza»