Veloso: «Aos cinco minutos era como se non me tivera baixado da bicicleta»

Vinte anos recorrendo estradas de medio mundo no pelotón profesional proporcionan unha bagaxe inmensa, de incalculable valor para levar unha situación única e, confiemos, irrepetible coma a do confinamento pola pandemia do covid-19. Axudado tamén, xusto é dicilo, pola práctica dun deporte no que o rodillo permite manter un considerable nivel de parecido coa realidade do asfalto, Gustavo César Veloso regresaba a primeira hora da noite de onte do seu primeiro adestramento no medio do estado de alarma facendo bo aquilo de que quen aprende a montar en bici non esquece nunca como facelo.

«Os primeiros 5 minutos sentínme un pouco raro na bicicleta, por levar tanto tempo no rodillo. Pero despois, foi coma se non me tivera baixado dela», comentou o bicampión da Volta a Portugal, vencedor dunha Volta a Catalunya e dunha etapa da Vuelta a España.

Máis aló do deportivo, o que máis notou Veloso foi o cambio ambiental: «Si que tiven unha sensación un pouco estraña despois de 45 días sen saír da casa a adestrar, como cando volvo dunha concentración en altura. Vin a vexetación moi crecida, o monte moi cambiado».

Veloso agradece «volver sentir o aire na cara». Con todo, a única ocupación da súa cabeza é cumprir co seu obxectivo. E este non é outro co de «seguir levándoo con paciencia, con tranquilidade, mantendo a forma que tiña antes do confinamento, para estar en condicións o día que poidamos volver competir». E en que punto se atopa neste momento tras mes e medio de traballo na casa só o saberá, di, «cando leve 3-4 días de volta á estrada».

---

---

---