Unha creadora de contido responde as críticas por falar en galego: «Como podes pensar que é unha moda?»
SOCIEDAD
Ana Paz decidiu comezar a empregar a súa lingua hai apenas un mes. «Se te nota que no hablaste en gallego en tu vida», dixéronlle en TikTok
17 ene 2025 . Actualizado a las 16:27 h.Chámase Ana Paz, ten 25 anos, estudia Publicidade y Relacións Públicas e gústalle crear contido nas redes sociais onde amosa o seu día a día, os seus looks ou a súa experiencia nas viaxes. En definitiva a súa vída.
O que non esperaba esta galega era ter que enfrontarse ás críticas precisamente por falar na súa lingua. Porque iso é o que fai nalgúns vídeos en TikTok ou nos próximos que vai publicar en Youtube. Ana decidiu hai un mes comezar a falar galego. Non importa se é unha gravación sobre exames ou sobre a súa afección por escribir. Ana fai contido en galego, algo que normalmente é ben recibido entre os seus máis de 142.000 seguidores.
Hai uns días, esta creadora de contido, que tamén ten unha marca de xoias chamada Solete, recibiu un comentario sobre o uso da lingua. «Es mejor que hables castellano a que hables en gallego por postureo porque es literalmente por eso. Se te nota que no hablaste en gallego en tu vida», le decía un seguidor o seguidora. Unha mensaxe á que contestou de xeito inmediato. «Como podes pensar que falar galego é unha moda xusto no momento no que hai menos galegofalantes en Galicia?», asegura.
Non é a primeira vez que esta moza recibe este tipo de críticas. «Ademais deste comentario, fanme gracia outros comentarios que me din que o meu galego non é galego, que se nota que non o falei na miña vida. Cando subín o meu primeiro vídeo en galego dixen que levaba toda a vida falando en castelán». Ese foi o motivo que lle fixo apostar pola lingua. «O meu galego non vai ser o mellor. Hai moitos comentarios dicindo que o meu galego non é galego de verdade. Síntoo, polo menos estou a falar en galego», asegura engadindo que non recibiu críticas de ningún galegofalante.
Os apoios non se fixeron esperar a este vídeo de Ana e, entre os máis de 600 comentarios que ten en TikTok, abundan apoios con frases coma «O único galego mal falado, é o que non se fala» ou «Que empezaras a falar galego foi o mellor regalo que nos deixou este Nadal». Tamén lle dan os parabéns moitos dos seus seguidores que son de fóra de Galicia. «Me encantan tus videos falando galego, así los demás también conocemos más el idioma», dille unha usuaria da rede.
Incluso o perfil de TikTok do Celta de Vigo quixo apoiar a esta creadora de contido cun sentido: «Coidemos a nosa lingua», que suma máis de 3.000 likes.
Ana comezou a empregar tanto o galego coma o castelán nas súas redes a finais do 2024. Arrancou cun «get ready with me» no que contaba que ese era o propósito que lle quedaba do ano. «Levo desde o día 22 intentando falar en galego e falo galego coa miña familia, co meu mozo e tamén estou intentando falar cos meus amigos».
Explica ademais que recorda falar galego cando era nena, pero que ao entrar no colexio cambiou ao castelán. «Sempre estou defendendo Galicia, a terra e todas estas cousas, pero faltábame falar galego e iso é moi importante. É o ano no que hai menos galegofalantes e iso non pode ser».