Miguel Loureiro: «Nunca cheguei a imaxinarme xogando no Dépor, non me atrevía a soñalo»
TORRE DE MARATHÓN
O defensa cercedense foi presentado ante os medios en Abegondo, onde destacou o esforzo que fixeron as dúas partes para a fichaxe
13 ago 2025 . Actualizado a las 18:05 h.Miguel Loureiro tivo a súa presentación ante os medios. Na sala de prensa de Abegondo referiuse á ilusión que lle fai o retorno ao equipo no que militou sendo infantil: «Nunca cheguei a imaxinarme xogando no Deportivo. Na miña mente non me atrevía a soñalo. Estou moi contento de vivir isto, superou as miñas expectativas».
Para acabar na Coruña tivo que facer valer a súa determinación diante do equipo propietario do seu pase: «O Huesca sabía perfectamente cal era o meu desexo desde que chamou o Dépor. Aquí fixeron un esforzo importante, e eu tamén puxen moito da miña parte. Estou moi feliz».
Foi clave tamén o interese de Antonio Hidalgo. «Entendo que para que un club aposte por ti teñen que estar de acordo todas as partes. O corpo técnico é unha parte importante. Antonio desde o primeiro momento quíxome traer e demostroume toda a súa confianza. Quería que estivese aquí con el, e eu, encantado. É un míster ao que lle debo moito, que apostou por min e confiou. Agradézolle o interese e a proposta», destacou Loureiro.
«O equipo necesita ese punto de carácter, de empuxar, de falar. E iso vai coas miñas características. Sempre é algo que me saíu de maneira natural. Teño que contaxiar a miña enerxía aos compañeiros», subliñou o cercedense.