O adestrador do Gran Peña destaca o «emotivo» que supón ser o equipo do centenario do Gran Peña
25 ago 2025 . Actualizado a las 05:00 h.Martín Blanco repite por segunda tempada á fronte do banquillo do Gran Peña. O curso pasado, tras a desvinculación co Celta, o adestrador vigués foi capaz de levar ao histórico equipo de Lavadores a un ano tranquilo cando todo apuntaba noutra dirección. Agora ve máis potencial, pero lembra que iso no da puntos e ten claro que obxectivo debe ser a permanencia en Terceira Federación, máxime tendo en conta que é o ano do centenario.
—Como ve ao Gran Peña para esta tempada?
—Pois un ano de moitos cambios como agardabamos, pero creo que temos máis estabilidade que a tempada pasada. Temos 10 xogadores que continúan, pero aínda así hai que conxuntar moitas pezas e estamos nese proceso.
—Que tal a plantilla?
—Considero que fixemos unhas boas incorporacións, sobre todo na parte de arriba, creo que aí estamos ben con Fran López e Cellerino, nas bandas incorporamos a xogadores como Coira en Fontán e en defensa tivemos incorporacións para subir o nivel. Igual onde temos algo de dúbidas é no medio campo, onde sufrimos algunhas baixas. Estou contento ca plantilla, pero agora hai que conxuntala e facer un bo equipo.
—A dificultade parece menor con respecto ao curso pasado?
—A priori estamos un pouco máis tranquilos, pero iso non da puntos. O ano pasado, dende a humildade, sabendo que eramos a cenicienta, tiñamos moita capacidade de sufrimento e cada vitoria era unha festa e unha alegría. Partíamos cun listón moi baixo e todo eran superar expectativas, pero este ano queremos manter a categoría e mellorar o do ano pasado. Creo que estamos nunha mellor situación pero non é garantía de puntos. O noso orzamento segue sendo o máis baixo da categoría, pero o equipo é máis sólido.
—Esta temporada 25/26 coincide ademais co centenario do Gran Peña.
—Tamén, por iso queremos facer un bo ano e rematar o 2026 en Terceira Federación. Vai ser un ano motivo, onde haberá unha serie de eventos durante toda a tempada. Dende logo que nos fai ilusión ser o equipo do centenario do Gran Peña.
—O Compostela é o coco da categoría?
—Compostela e Arousa son os favoritos e logo imaxino que pode estar o Vilalbés, o Boiro tamén está facendo un bo desembolso. Creo que logo o resto estamos bastante máis nivelados.
—Para vostede é a segunda tempada no banquillo do Gran Peña, como se está topando?
—Ben, collendo cada vez máis a categoría, así afrontas o curso con máis confianza despois do ano pasado. Sabemos que isto é moi difícil e debemos collelo ca ilusión de mellorar a tempada anterior.
—Por outra banda, que tal na súa faceta de axente?
—Traballo para Stellar. Levo case cinco anos e estou contento. Gústame máis estar cerca dos terreos de xogo, pero tamén me permite estar preto do fútbol e pódese dicir que é un traballo bonito.
—Fai máis traballo de «scouting» ou negociacións?
—A verdade é que fago de todo. Tes que facer todo o proceso, desde captar, a facer seguimento e tamén negociacións e contactos. Teño unha empresa moi forte detrás e a verdade é que se traballa moi a gusto.