A campaña da asociación que reúne a 19 entidades locais a prol da lingua incorpora un tema electro-latino de Fátima Pego e Grande Amore
19 abr 2023 . Actualizado a las 22:03 h.A lingua pode coidarse coma un obxecto de museo ou eses xarróns chineses aos que un día se referiu Felipe González, se cadra valiosos, aínda que ninguén sabe que facer exactamente con eles, a risco de esnaquizalos. Ou ben pode coidarse de xeito activo, empregándoa e dándolle vida en calquera eido. Este é o espírito que anima É túa. Pásaa!, o lema baixo o que a asociación Alingua vén de presentar a súa campaña para o primeiro semestre deste ano. Esa mesma mensaxe figura xa en lonas nas fachadas dos 19 concellos e a Deputación de Pontevedra, como integrante amiga, que forman parte dun colectivo fundado por e para a dinamización da lingua.
A campaña presentouse esta mañá en Vilagarcía de Arousa, coa participación dunha ampla representación institucional. En Alingua converxen os concellos de A Baña, Ames, A Coruña, Betanzos, Carballo, Cedeira, Ferrol, Moaña, Narón, O Grove, Ponteceso, Pontevedra, Redondela, Ribadeo, Rianxo, Rois, Santiago, Teo e Vilagarcía, ademais da Deputación pontevedresa.
Máis aló desas lonas, a meirande visibilidade desta acción pasa polo eido musical. Unha peza de estilo electro-latino, composta por Fátima Prego e Grande Amore, pode verse e escoitarse xa nas redes sociais. Xunta este vídeo, ao longo do mes de maio as diferentes canles de Alingua estrearán unha webserie creada por María Rúa, O gran reto, na que tres persoas castelanfalantes amosarán a súa experiencia vivindo 21 días en galego. «Foi complexo por vivir nun contorno maioritariamente castelanfalante», recoñece Martiña Pérez, unha das participantes na experiencia. Entrevistas, novos recursos en galego ou sorteos para visitar o fondo mariño son outras das iniciativas que se han desenvolver nos vindeiros meses.
«Somos conscientes das vantaxes do traballo cooperativo, da importancia fundamental da colaboración para a política lingüística, pois ademais de permitir rendabilizar esforzos, axuda a visibilizar as accións que se realizan para dinamizar o uso da lingua, facendo que acade un maior impacto e incidencia na sociedade». Así resumiu Leticia Santos, alcaldesa de Moaña e vicepresidenta da asociación, a perspectiva que anima Alinua, un colectivo que tende os seus brazos, abertos, a calquera entidade disposta a defender e promocionar a lingua.
