O director Daniel Sánchez Arévalo acudirá ao Festival de Cans, que terá 40 estreas
O PORRIÑO
No certame de cine porriñés, que será do 20 ao 24 de maio, haberá 25 actuacións musicais, con artistas como Biznaga, Caamaño e Ameixeiras e Susana Seivane
07 may 2025 . Actualizado a las 05:00 h.A aldea porriñesa de Cans xa respira ambiente de festival. Na mañá de onte celebrouse no Torreiro o acto de presentación oficial da súa 22ª edición. Entre os días 20 e 24 de maio, transcorrerá un dos eventos culturais máis singulares de Galicia.
O cineasta Daniel Sánchez Arévalo protagonizará un coloquio o sábado ás 12.00 horas. Acaba de filmar a súa sexta película, Rondallas, que levanta gran expectación entre o público da comarca ao estar moi relacionada coa zona da Louriña e con varias formacións musicais do Porriño. O director estará na sección Extracans, que se recupera nesta edición do festival e onde presentará Pipiolos, curtametraxe que vén de triunfar en Málaga.
En Cans haberá 25 actuacións musicais, con artistas como Biznaga, Caamaño e Ameixeiras, Santero y los Muchachos, Banda da Loba, Susana Seivane ou Guadalupe Plata. O certame homenaxeará ao prisioneiro debuxante de San Simón Alfredo Bautista Alconero, Reisiño, á Señora Alicia e Castelao, entre outros.
Proxectaranse un total de 120 obras e haberá 40 estreas. O acto contou coa participación do alcalde do Porriño, Alejandro Lorenzo, e do presidente da Deputación de Pontevedra, Luis López, e o director da Agadic da Xuntade Galicia, Jacobo Sutil.