O espectáculo do Apóstolo queimou en 18 minutos 3.000 quilos de pólvora valenciana
25 jul 2025 . Actualizado a las 12:01 h.Non existe unha maneira máis especial de arrincar o Día Grande do Apóstolo que cunha noite previa de espectáculo, que polas vésperas se sacan os días festivos. O ceo compostelán, escuro de noite e branco de estrelas, quedou iluminado por luces intermitentes e palmeiras de cores que parecían querer adiantar a alba a rabuñadas para arribar o Día de Galicia.
Foron 3.000 quilos de pólvora queimados ao longo de dezaoito minutos da intensidade prometida por Pirotecnia del Mediterráneo. Non serían as fallas, pero a empresa valenciana encargada do lanzamento dos fogos tivo que sentirse satisfeita por ter cumprido a súa promesa de ofrecer un espectáculo que fusionou a pirotecnia tradicional coa de vangarda —demostrada polo aforro de fume na súa combustión e o uso de materiais ecofriendly respectuosos coa terra—. Repetirán experiencia o día 31 nos «fogos pequenos», os que clausuran as festas, e a firma valenciana será a primeira en gozar dunha prórroga asegurada coa licitación de dúas anualidades polo Concello.
Atrás no recordo vai quedando a vella casa dos fogos, a praza do Obradoiro, despois da rehabilitación da catedral e da aceptación social de que a contorna patrimonial non podía soportar máis tempo o espectáculo.
Por iso agora son tres lugares —outros anos foron cinco— os escollidos para dispersar o lanzamento dos fogos. Nesta ocasión, santiagueses, turistas e peregrinos curiosos puideron reunirse na Alameda, no parque Carlomagno, no barrio de Fontiñas, e na Cidade da Cultura ou botarse ás rúas e a cadanseus balcóns (para aqueles de vistas privilexiadas).
A estratexia é complexa: sincronizar dixitalmente os 1.000 quilos de pirotecnia e subdividilos en 33 fases. E dende as 23.30 horas, a atención quedou roubada pola ledicia visual que ofreceu unha gama cromática de máis de 160 referencias definidas, ademais do clásico son do despegue dos fogos. E mosaicos, espigas brancas e cometas.
O monte Gaiás está resultando o gran substituto do fogar vello que fora o Obradoiro, pois sendo un dos puntos máis altos de Compostela, repetiu este ano contribuíndo a que a maxia das luces chegase a boa parte da cidade, co marco da Cidade da Cultura en troques da catedral.
Outra oportunidade
O público que se perdeu estes Fogos do Apóstolo ou que quedase con ganas doutra noite de luz e de barullo deberá esperar á noite do 31 para despedir, en lugar de saudar, ao Apóstolo. E, como «fogos pequenos», veranse así de cativos en canto a cantidade de pólvora e número de localizacións. Os tres puntos de lanzamentos quedarán reducidos a un, que nesta ocasión será a Alameda. O clamor do público irá avaliando así a estrea de Pirotecnia del Mediterráneo para que poida ir xa perfilando a súa vindeira Serendipia, como quixo bautizar á súa exhibición, que tivo un custo de 433.180 euros e menos pólvora que o ano pasado na primeira sesión. Cousas da reduflación.
Cabezudos, Compostela Cinema e Trad Fest: o próximo das festas
Tras o barullo e a pólvora do espectáculo de pirotecnia de onte á noite, o Día de Galicia celebrarase no marco das Festas do Apóstolo cun programa de cabezudos e concertos. A comparsa de cabezudos arrancará ás 12 horas nun percorrido circular e rematará na Rúa Nova. No parque de Galeras iniciarase a sesión de concertos con Ker Kuez ás 21 horas, e as 22 horas daranse simultaneamente os concertos de Maika Makovski, na praza da Quintana, e a Orquestra Galilea, na Alameda.
As Festas do Apóstolo continúan mañá coa alborada a cargo da Asociación Cultural Pena Maior de Marrozos (de 10 a 12 horas); o Compostela Cinema, coa proxección de Chicken Run 2, no Parque de Eugenio Granell (ás 20.30 horas) e os concertos de Aida Saco, ás 21 horas no Parque de Galeras; e Lura, ás 22 horas na praza da Quintana.
O domingo 27 terá lugar o festival de música tradicional, Trad Fest, con acción en Bonaval, Mazarelos e A Quintana. De Barullo sabe Baiuca, que presentará o seu último traballo, que así se chama, nun concerto a partir das 22.30 horas na Quintana.