Alumnos e mestres afondarán na súa obra a través de vídeos e exposicións
22 oct 2015 . Actualizado a las 05:00 h.O instituto Fermín Bouza Brey celebra hoxe e mañá a segunda edición das xornadas dedicadas ao intelectual galego que lle puxo nome ao centro educativo. Baixo o nome Fermín Bouza Brey, un intelectual na Arousa, durante dous días haberá charlas, entrevistas, exposicións, vídeos e ata performances que afondan na figura dun dos autores máis representativos da comarca.
As xornadas abriranse hoxe ás 9,30 horas coa presenza da concelleira de Cultura Sonia Outón, a vicedirectora do IES Bouza Brey, Carme Fariña, e Valentín García, secretario xeral de Política Lingüística. Ao longo da mañá falarán o biógrafo o poeta, Antón Lopo, mentres que Anxo Angueira abordará a particular relación que existiu entre Bouza Brey e Rosalía de Castro. Pola súa banda, Carlos Callón disertará sobre A vivencia da homofobia na obra de Fermín Bouza Brey.
Traballos didácticos
As xornadas contan coa participación de alumnos do centro que presentarán os traballos de investigación que fixeron ao longo do curso pasado: vídeos didácticos, exposicións e entrevistas, entre outras propostas.
As conferencias coinciden ademais coa apertura dunha exposición sobre o poeta aberta á entrada do centro educativo.
As xornadas, por outra banda, son gratuítas, polo que están abertas a calquera persoa que queira asistir, non só á comunidade educativa.