O C.R. Vilaxoán gaña a bandeira de apertura da tempada de bateis con autoridade
AROUSA
O club anfitrión gañou no seu porto en todas as categorías agás na xuvenil masculina, na que foi segundo, e na infantil, na que non conta con tripulación este ano
11 feb 2018 . Actualizado a las 05:00 h.Exercía de anfitrión na Bandeira Confraría de Pescadores de Vilaxoán, e foi o orgullo dos seus veciños. O C.R. Vilaxoán gañou en practicamente todas as categorías en lid na tarde de onte na proba inaugural da tempada da Territorial Sur de Bateis, disputada no porto do lugar vilagarcián. En todas, agás na de xuvenil masculina, na que foi segundo tras a tripulación de Samertolameu, a 6,59 segundos, e na infantil, única categoría na que non dispón de remeiros suficientes para competir esta tempada.
Coa suma de todas as primeiras embarcacións dos clubs participantes, o C.R. Vilaxoán levouse a Bandeira Confraría de Pescadores de Vilaxoán con nada menos ca 46 puntos, polos 18 do C.R. Mecos, segundo clasificado, e polos 15 de Amegrove, que completou un podio integramente arousán. O C.R. Mecos foi segundo nas categorías infantil, cadete e absoluta masculina. A vindeira cita, o sábado 17, na Bandeira Amegrove.