O Fontecarmoa inicia o Campionato de España por equipos con derrota: 3,5-2,5
AROUSA
Tras caer co Collado Villalba mídese en segunda rolda ao Excalibur Albacete
10 sep 2021 . Actualizado a las 05:00 h.Difícil emparellamento tiña o Club Xadrez Fontecarmoa na primeira xornada do Campionato de España de Clubs da Primeira División. En Linares, Jaén, o equipo vilagarcián debía medirse a un Collado Villalba cun sexteto de xogadores con títulos internacionais. E finalmente, a lóxica impúxose, con triunfo, certo é, que pola mínima, do cadro madrileño: 3,5-2,5.
As derrotas de Andrea Dorado e de Héctor Laiz tras 3 horas de xogo lastraron o duelo para os intereses arousáns, se ben Roi Reinaldo abría a esperanza cunhas táboas. Mesmo resultado co colleitado por Julio Suárez diante dun dos mellores xadrecistas da Primeira División, Renier Vázquez.
Lucas Abal levou o choque ao límite sumando un punto que deixaba o sino do encontro na mesa de Andrés Rodríguez Ferreirós. Pero o xogador da canteira do C.X. Fontecarmoa pagou a falta de tempo no seu reloxio e a boa defensa da súa rival, a Mestra FIDE Lulu Zhou, asinando táboas.
Con este resultado, o C.X. Fontecarmoa pechou a primeira rolda antepenúltimo, xusto un posto por riba da zona de descenso. Na segunda rolda o equipo vilagarcián enfróntase ao Excalibur Albacete, que se estreou no Nacional cun 3-3 fronte ao Barberá.