É a terceira entrega da celebrada colaboración entre Carlos Blanco e Xosé Antonio Touriñán
09 mar 2023 . Actualizado a las 20:36 h.Aínda que a data do seu desembarco en Vilagarcía fica aínda lonxe, o 21 de abril, Somos Criminais 3, a terceira entrega da celebrada colaboración entre Carlos Blanco e Xosé Antonio Touriñán, vén de esgotar xa as súas entradas. Á vista do seu éxito, a capital arousá contará cun segundo pase da función, que se desenvolverá ese mesmo día a partir das once da noite. As butacas para esta segunda sesión póñense á venda este venres, 10 de marzo, en ataquilla.com ao prezo de 18, 15 e 12 euros máis custes de xestión.
En Somos Criminais 3, os humoristas analizan Galicia e os seus habitantes para debullar quen somos e por que somos como somos. Coa retranca que é marca da casa, o espectáculo trata de responder con humor a cuestións como somos criminais no sentido menos criminal da palabra?, temos a nosa forma de ser e ser?, respondemos preguntas con preguntas?, ou non sabes se subimos ou baixamos?