Kevin Longo consegue o segundo bronce arousán no Europeo de piragüismo de maratón
AROUSA
O padexeiro do As Torres-Romaría Vikinga de Catoira pechou o podio do C1 Sub 23 en Poznan
26 jul 2024 . Actualizado a las 18:35 h.O piragüismo arousán avanza no Campionato de Europa de Maratón a ritmo de medalla por día. Concretamente, a bronce diario, coas novas xeracións de fondistas prologando a agardada nova rica colleita das estrelas veteranas da comarca na especialidade a partir de hoxe.
O xoves, na proba de apertura do programa do Europeo que se celebra na cidade polaca de Poznan, a padexeira do Náutico Pontecesures Candela Romero confirmou a súa condición de figura emerxente do maratón. Cun tempo de 1 hora, 14 minutos, 10 segundos e 7 centésimas, pechou o podio da canoa individual júnior feminina por detrás da polaca Agata Kowalak, ouro en 1.09.41,19, e da checa Tereza Kodetova, prata en 1.10.30,96.
Este venres foi Kevin Longo o que recolleu o bronce. No caso do canoísta do As Torres-Romaría Vikinga, na final de C1 Sub 23 Home, rematando en 1.38.05,87. O polaco Eryk Wilga foi o campión, en 1.36.23,10, e o húngaro Mihaly Pluzsik prata, en 1.37.01,62.
O breoganista Diego Romero rematou o xoves cuarto no C1 Sénior Curto. Hoxe tentará gañar o título no C1 estándar, como o seu compañeiro Tono Campos, con Tania Álvarez (Breogán) e con Iván Alonso (As Torres) facendo o propio no K1.