O tributo ao grupo Queen chega esta noite a San Roque con medio millón de espectadores detrás

Achégase o final das Festas de San Roque e, con el, a fin da música nas rúas de Vilagarcía. Nesta edición, os encargados de pechar a xornada de hoxe son Remember Queen, que ofrecerán o seu concerto ás 00.30 horas na avenida da Mariña. A banda levará ao escenario un tributo ao célebre grupo musical Queen e os seus 20 anos de experiencia nos mellores escenarios de toda Europa, como é o caso da Gran Vía de Madrid.

Máis de medio millón de persoas puideron apreciar o espectáculo destes artistas, que coidan o máis mínimo detalle do espectáculo orixinal, cunha posta en escena similar á que os integrantes da banda británica utilizaban na xira do 1986. Un repaso aos grandes éxitos da banda británica,We are the Champions ou Bohemian Rapsody, cun despregamento técnico que, segundo aseguran, non deixará indiferente a ninguén.

O gran cantante da banda orixinal, Freddy Mercury, é imitado por Piero Venery, quen nos ofrece unha caracterización do artista que calca os seus xestos, bailes e posta en escena con sumo coidado. O concerto pecha a xornada de hoxe das Festas de San Roque, tras a diversión diaria proposta polos artistas do Festaclown.

---

---

---