A Brilat celebrará en Vilagarcía a Festa Nacional cunha exposición, música e xura de bandeira civil

A Brigada Galicia VII- Brilat do Exército de Terra ten previsto realizar en Vilagarcía varios actos con motivo do Día da Festa Nacional. As celebracións terán lugar os días 27 e 28 de setembro e consistirán nun concerto de música militar, unha exhibición de medios materiais do Exército e un acto de xura de bandeira para persoal civil. Para dar a coñecer estas actividades e facilitar a inscrición ás persoas que desexen xurar bandeira, persoal da base de Figueirido instalará mañá, 10 de setembro, unha carpa informativa na praza de Galicia.

As celebracións comezarán o día 27 cun concerto de Bandas a cargo da Unidade de Música do Mando de Apoio á Manobra no auditorio a partir das 20 horas e con entrada libre e de balde ata completar aforo.

Os actos centrais serán o sábado 28 de setembro e desenvolveranse no Parque Miguel Hernández. Alí organizarase a exposición estática e interactiva de material do exército de Terra e tamén se realizarán xogos e actividades para o público infantil tanto o día 27 como o 28 pola mañá.

A celebración do Día na Festa Nacional culminará coa xura de bandeira civil o sábado a mediodía. As persoas interesadas en xurar por primeira vez ou renovar o seu xuramento poden anotarse na carpa instalada para tal fin ou contactando coa Subdelegación de Defensa de Pontevedra a través do teléfono 986 807 535 ou do correo electrónico: personalsddpontevedra@mde.es.

O Exército de Terra fai un achegamento á poboación civil para dar a coñecer a labor que realizan as tropas en España e no estranxeiro.

---

---

---