O PP da Illa de Arousa alerta da suba de taxas e da recadación por multas de tráfico para 2025
AROUSA
A oposición sinala que os orzamentos aprobados o venres coa súa ausencia no pleno son «moito peores» que os do ano pasado
18 mar 2025 . Actualizado a las 15:55 h.O PP da Illa valora «moi negativamente» o orzamento do Concello do 2025 aprobado o pasado venres en pleno coa súa ausencia. O grupo da oposición xustificouno en que a alcaldía cambiou a data do pleno sen consenso previo; hoxe falan de «autoritarismo» e pronunciáronse sobre un documento do que critican a suba de taxas fiscais «un 16,3 % ata elevar a súa recadación por riba do millón de euros», explican. O PP lamenta, ademais, que «o único imposto que interesaba que incrementase a recadación, que é o de obras, baixe nun 25 %, o que quere dicir que o propio goberno augura outro mal ano para que os veciños se poidan facer a súa casa».
Os populares tamén critican a falta de dotación económica para proxectos comprometidos desde hai anos polo PSOE como o novo pavillón, «accións reais» no eido urbanístico para favorecer ao acceso a unha vivenda, pistas deportivas ao aire libre, centro de día ou casa da xuventude, entre outras.
Os conservadores aproveitan para pedirlle ao goberno local «que dea a coñecer as súas intencións en materia de tráfico e aparcamento «porque o proxecto económico contempla un aumento das multas de tráfico en 63.000 euros para o presente ano 2025, a creación dunha nova taxa de estacionamento que agardamos que sexa, como dixeron, ‘só para xente de fóra’ e a compra de máquinas de pago, cunha partida de 18.000 euros para implantar esta medida», sinala o voceiro do PP da Illa, Matías Cañón.
«O ano pasado abstivémonos, xa que eran as primeiras contas do mandato e quixemos dar un voto de confianza ao goberno, pero os orzamentos deste ano son aínda moito peores, porque afondan nos erros e nas políticas de costas aos veciños e non aportan ningunha solución nos temas de maior importancia».
E mentres o concelleiro de Economía e Facenda, Manuel Suárez (BNG), fala do «orzamento máis alto da historia da Illa sen préstamos» o PP fai fincapé en que «gran parte destas contas son posibles grazas ás importantes achegas da Xunta e da Deputación, malia as constantes e, polo que se ve, falsas acusacións do goberno local».