Os visitantes de Santiago de Compostela, Pontevedra, Vigo e arredores non poderán volver ata despois das 19 horas
15 ago 2025 . Actualizado a las 20:59 h.As Festas de San Roque son unha celebración moi esperada non só polos propios vilagarciáns, senón tamén pola xente que se atopa na zona. Nesta edición, as máis de cincuenta actividades dan un atractivo engadido ao destino. Os interesados en participar dos festexos soamente teñen unha preocupación: para as viaxes tanto para chegar á capital arousá como para voltar ás súas casas non hai prazas no tren, o transporte máis requirido. Xa sexa pola súa frecuencia, como pola rapidez da viaxe, este medio de transporte é o favorito e iso reflíctese na ocupación dos vehículos.
Evidentemente, o problema é que a pesar da disposición dos trens, as prazas son limitadas. Hoxe, o traxecto Vilagarcía-Santiago de Compostela amañece totalmente ocupado ata ás 18.48 horas. A xente non quere perderse de ningún evento e o resultado é un ascenso da demanda para coller o primeiro transporte posible e emprender o camiño aos seus lugares de orixe. Iso débese a que a programación de onte estendeuse ata despois das once da noite cando xa non existen opcións de regreso no transporte público.
É verdade que a dispoñibilidade flutúa dependendo do momento da procura, pero a tendencia é clara: cara Santiago e os pobos intermedios non se pode chegar ata ás 19 horas. Destinos coma Vigo e Pontevedra non ían a ser a excepción. Os viaxeiros que veñen dende Vigo e que aínda non teñan o billete de volta, poderán mercar o que sae ás 15.53 horas. Ese mesmo tren será o encargado de levar aos pontevedreses que tampouco tiveron sorte de mercar con antelación.
O mesmo acontece cos traxectos de ida. Os tres destinos rexistraron unha venda total, esgotando todas as prazas posibles. Os persistentes podían chegar a conseguir un lugar tras a insistencia de actualizar a páxina de Renfe. Pero asegurala resultaba ser unha lotería, a sorte estaba botada.
Dende logo será unha xornada longa que promete ter moitas atraccións para o público. Haberá quen aproveite a oportunidade para continuar a súa visita a Vilagarcía formando parte da tan ansiada Festa da Auga que comeza ás 11.45 co traslado de San Roque.
A realidade é que as persoas teñen que elixir o medio de transporte e tamén se lles convén o feito de pernoitar na cidade para seguir festexando con máis enerxía. A xente que ten coche igualmente debe contemplar que os espazos de aparcamento tamén son finitos. Sexa nas vías o na estrada, hoxe e os próximos días os aparcamentos estarán cheos.