A Carreira Popular Concello de Meaño preséntase lucindo o cartel de clásica do atletismo galego
AROUSA
A XXXIX edición mantén os premios que tanto atraen os corredores deste tipo de probas
28 ago 2025 . Actualizado a las 05:00 h.O 14 de setembro, cumprindo coa tradición asociada á proba, a Carreira Popular Concello de Meaño celebrará unha nova edición no segundo domingo do noveno mes do ano. Será a número 39. Unha cifra que lle valeu onte ao alcalde da localidade, Carlos Viéitez, para salientar na presentación da proba a súa condición de «clásica no calendario das carreiras do atletismo de Galicia».
Nomes como os de Pedro Nimo, Hassam Lekhili, Alejandro Fernández, Antonio Serrat, as portuguesas Leonor Carneiro e Ercilia Machado, ou os de Paula Mayobre e Esther Navarrete corroboran outro dos apuntamentos de Viéitez: a Popular de Meaño «soe ter un nivel moi alto na súa distancia absoluta».
Pendentes de saber se o atleta da Illa de Arousa Pablo Otero e a da Guarda Eva Piñel participarán este ano defendendo a condición de gañadores do ano anterior, a cita meañesa abriu o seu prazo de inscricións ata o mércores 10 de setembro, a través da páxina web: www.deporticket.com.
Nas bases de competición, ningunha gran novidade, máis aló de que a saída da proba raíña, sobre 6.330 metros, se fará ás once da mañá un cuarto de hora despois cas das outras dúas distancias, as dos circuítos curto, de 1.070 metros, e mediano, de 1.600, ambos os dous con pistoletazo ás once menos cuarto. Haberá ata 18 clasificacións, nove masculinas e outras tantas femininas, en función da idade dos corredores, pudendo participar todos aqueles nados no ano 2020 e anteriores.
A organización, a cargo do Concello, mantén da man dos seus patrocinadores principais os premios que tanto interese espertan entre os corredores galegos de populares para o mellor e a mellor da distancia raíña. O primeiro premio, doado por Paco & Lola, de 300 euros e o peso do deportista en botellas de viño da adega local, o segundo, de 200 euros e unha fin de semana na Quinta de San Amaro para os segundos; e o terceiro, de 100 euros e unha cesta con produtos típicos xentileza de Súper Lage. Representantes dos patrocinadores asistiron á presentación na Quinta de San Amaro, que contou tamén coa atleta da SD Santiago Martina López.