Ángel Sánchez escala á quinta praza da xeral da Vuelta Ciclista a Venezuela
AROUSA
O cambadés do Tavfer Ovos Matinados Mortagua rematou no mesmo posto a dura segunda etapa da rolda sudamericana
10 sep 2025 . Actualizado a las 05:00 h.Con suma ambición. Así está a encarar o cambadés do Tavfer Ovos Matinados Mortagua, Ángel Sánchez, a súa participación na 61.ª Vuelta Ciclista a Venezuela. O luns, na segunda das oito etapas da rolda sudamericana, completando a xornada na quinta praza da clasificación xeral.
O corredor galego do equipo que dirixe o vilagarcián Gustavo César Veloso asinou unha gran carreira, colándose como único ciclista non venezolano nin colombiano no Top 10 dunha das etapas máis montañosas da volta, con tres portos e unha ascensión de primeira categoría á cidade de Mérida. Tras dez quilómetros e medio de subida ao 4,4 por cento, Luis Guillermo Mora, venezolano do equipo Gobierno de Trujillo-MPP Comercio, ergueu os brazos en solitario como primeiro en cubrir os 179,1 quilómetros desde a localidade de La Fría cun tempo de 4 horas, 59 minutos e 32 segundos. O colombiano Juan Carlos López (GW-Erco Shimano) chegou despois a 35 segundos, seguido dos venezolanos Juan Ruiz (Gobierno de Trujillo-MPP Comercio) e Anderson Paredes (Lotería del Táchira), a 38 e 49 segundos, respectivamente, e de Ángel Sánchez, a 1 minuto e 53 segundos.
Tras a súa actuación na etapa de Mérida, e logo de ser protagonista na xornada inaugural cunha escapada en solitario que o pelotón acabou afogando a só quince quilómetros da chegada, o corredor cambadés do Tavfer Ovos Matinados Mortagua iniciaba onte os 141 quilómetros entre Lagunillas e Santa Elena de Arenales quinto da xeral provisional a 2 minutos e 5 segundos do líder, Luis Guillermo Mora.