O conxunto vilagarcián aspira a ampliar o seu pleno de triunfos
01 nov 2025 . Actualizado a las 05:00 h.A quinta vitoria do Mariscos Antón Cortegada na Liga 2025/26 pasa por superar esta tarde, desde as 18 horas no parqué do Pavillón Municipal Sara Gómez, o Horbisa Spirit Greenkw Barakaldo. Un equipo que, cun triunfo e tres derrotas, mira neste primeiro mes de campionato moi desde abaixo o cadro vilagarcián.
O adestrador do Cortegada, Manu Santos, advirte do perigo de caer no engano de atender aos números simplificados da tarxeta de visita do cadro éuscaro. Neste punto, subliña que o seu rival hoxe tan só caeu de dos puntos en Manresa (51-49) e de tres como local a pasada fin de semana ante o equipo co que o Mariscos Antón comparte liderado con pleno de vitorias, o Maristas Coruña. Con interiores grandes, o seu maior perigo, di Manu Santos, é a cinco senegalesa Mareme Diop, con 11,75 puntos e 8,5 rebotes de promedio por partido, ben secundada en funcións de aleiro pola irlandesa Enya Maguire.
Claro que o equipo local chega ao choque en inmellorables condicións. E non só polo seu catro de catro. Cun mes de retraso, o adestrador do Cortegada poderá dispoñer hoxe, por primeira vez desde o inicio da pretempada, de todo o seu cadro de xogadoras ao completo. A catro brasileira Maira Horford encara a súa estrea, logo de pechar a súa primeira semana completa de adestramentos coas súas novas compañeiras tras chegar mes e medio tarde por un problema coa tramitación do seu visado.