Cambados terá un campamento de verán inspirado en Peter Pan e o circo de Bemposta

Nun mes rematará o curso escolar e empezarán a desenvolverse iniciativas públicas e privadas para facilitar a conciliación da vida laboral e familiar. Unha delas é a que propón a empresa Nordelaina, que, desde Cambados, segue innovando no sector. O seu campamento de verán 2025 ábrese a nenos de ata 14 anos e cambia de sitio, será no instituto Francisco Asorey.

Cada ano as actividades xiran ao arredor dunha temática e nesta ocasión estarán inspiradas nos nenos perdidos de Peter Pan e os nenos do circo de Bemposta que pasarán o verán nunha cidade ficticia: Muchachada City. «Un lugar autoxestionado por nenos e para nenos. Un lugar onde as regras dos adultos non se aplican. Un territorio independente sen goberno e creado por e para nenos e nenas. Eles mesmos establecerán a súa propia sociedade, definindo leis, organizando eleccións, desenvolvendo oficios, escolas taller e actividades de entretemento», segundo explica a empresa.

Muchachada City funcionará de 8 a 14.30 horas durante xullo e agosto, con posibilidade de dispoñer de «plan madruga» dende as 7.30 e «plan fiambreira» ata as 15.30 horas. Poderase contratar o verán completo, por quendas de mes, quincena ou semana solta. Nas semanas de xuño e setembro, Nordelaina tamén dará servizo desde as súas instalacións situada en San Tomé. Os 30 primeiros matriculados terán un desconto de 10 euros.

---

---

---