Cambados instala dez colectores marróns e abre esta semana a inscrición no plan piloto de reciclaxe

O Concello de Cambados pon en marcha un plan piloto de reciclaxe de orgánicos mediante a instalación dunha decena de colectores marróns no casco urbano. Están situados nas rúas Beleco, San Francisco, Pontevedra, Sabugueiro, Nova (2), Albariño, Santa Margarita e as avenidas da Pastora e Galicia. «A idea é que comecen a funcionar entre hoxe e mañá, en canto nos dea o visto bo Valoriza, a empresa responsable da colocación», explicou o alcalde, Samuel Lago.

Deste xeito, serán os veciños que queiran participar os que se teñan que achegar ao Concello para tramitar a inscrición na proba. Os usuarios recibirán unha chave coa que poder abrir os depósitos. Os cubos marróns soen funcionar deste xeito, ao entender que o interese parte do propio veciño ou veciña e que polo tanto se fai responsable de separar correctamente o lixo para que non se produzan interferencias con outro tipo de residuos.

Reducir o resto

Coa implantación deste colector búscase reducir a fracción «resto», que é na que se mesturan os desperdicios que non van nos depósitos de vidro, papel ou plástico. As persoas que utilicen o colector marrón poderán depositar restos de alimentos crus, cociñados, de froitas e verduras; de carne e peixe, incluídas as espiñas ou as cunchas do marisco; cascas de ovos; escarvadentes; pastas e arroces; froitos secos; restos de queixos; pousos de café; ou restos de plantas e herba, entre outros.

Estes restos descompóñense formando compost, un abono natural que se pode reutilizar, completando así o ciclo de reciclaxe. Actualmente, o Concello de Cambados conta con máis dunha ducia de centros de compostaxe, os últimos dous inaugurados no mes de novembro na rúa Ribeiriño e fronte ao colexio Magariños.

Pola contra, queda prohibido tirar aceite de cociña, tampóns ou compresas, papel hixiénico, area para mascotas, cabichas, cinzas ou chicles. En calquera caso, o Concello prepara uns dípticos informativos nos que se explican pormenorizadamente o uso. De feito, tamén se van a repartir unhas bolsas de lixo compostables específicas para este colector.

«A introdución do contedor marrón é un paso crucial para cumprir cos obxectivos europeos e facilitar a recollida dos residuos orgánicos, contribuíndo a preservar a nosa riqueza natural e construír un futuro mellor», din dende a administración.

O Concello estuda unha modificación da ordenanza para aplicar bonificacións a quen se sume á recollida de orgánico

Co obxectivo de incentivar á utilización do novo método de separación de residuos, o Concello abre a posibilidade de aprobar unha modificación da ordenanza municipal do lixo para poder aplicar bonificacións. Isto conlevará o reparto dunhas tarxetas unipersoais coas que poder identificar aos usuarios do novo sistema.

En calquera caso, será a medio prazo, porque o contrato de recollida de lixo está a piques de caducar. Trátase dunha fórmula comarcal, que depende da Mancomunidade do Salnés, e da que forman parte tamén os municipios de Vilanova e Meis.

A previsión é que o procedemento de renovación empece o ano que vén. A redacción dos pregos soe ser complexa, ao tratarse dunha contía elevada: o vixente custou uns 4 millóns de euros. Para o goberno local «o que ten máis sentido é sacar adiante a renovación do contrato e a modificación da ordenanza ao mesmo tempo».

---

---

---