O especialista completará, desde o 2 de setembro, a carteira de servizos do CIM
23 ago 2025 . Actualizado a las 05:00 h.O Centro de Información á Muller (CIM) do Concello de Catoira contará a partir do 2 de setembro cun psicólogo para as usuarias que o precisen. Unha mellora coa que, salienta o alcalde vikingo, Xoán Castaño (BNG), o CIM pasará a dispoñer de todos os servizos asociados a este tipo de departamento.
O psicólogo prestará atención semanal en horario de 9 a 11 horas. Entre as súas prioridades estará a de proporcionar orientación, principalmente a mulleres en situación de vulnerabilidade ou de violencia de xénero. Un labor que inclúe informar sobre os recursos dos que poden tirar, sobre estratexias para previr situacións de risco e como traballar a prol da súa saúde mental.
As usuarias do CIM que precisen do psicólogo poderán solicitar cita previa coa traballadora do departamento de Servizos Sociais do Concello, que lle asignará a correspondente quenda en función da dispoñibilidade do profesional. Ademais, valórase a atención de posibles urxencias.
As consultas realizaránse nas instalacións da casa do concello de Catoira, nas que tamén se presta xa servizo, desde o día 14 do presente mes, de asesoramento xurídico para as usuarias do Centro de Información á Muller que o precisen. Neste caso, todos os xoves, de 8.30 a 10.30 horas. A través da avogada que se ocupa do servizo, as mulleres de Catoira poden recibir asesoramento sobre os seus dereitos e opcións legais en casos de violencia de xénero, separacións, divorcios, custodia de menores ou acoso. A letrada tamén pode representar as mulleres en procesos xudiciais ou elaborar documentos legais como demandas, recursos ou contratos, ou negociar acordos extraxudiciais en conflitos familiares ou laborais.
O alcalde, Xoán Castaño, declarou a súa satisfacción por ter o Centro de Información á Muller traballando, subliña, a pleno rendemento, en tanto, di, proporciona unha ferramenta moi útil para garantirlles os seus dereitos e calidade de vida ás mulleres de Catoira.
Neste punto, o rexedor nacionalista lembra os diferentes trámites que o goberno local realizou nos últimos meses para adherirse ao CIM do que xa formaban parte os concellos de Valga, de Pontecesures e de Moraña, de cara a evitar que as catoirenses que precisasen dos servizos do CIM tivesen que desprazarse a outros municipios.