Os traballos de plantación corren por conta do obradoiro de emprego
19 feb 2025 . Actualizado a las 15:37 h.O Concello de Valga, a través do obradoiro de emprego, continúa a facer traballos de acondicionamento e posta a punto de zonas verdes e áreas de lecer do municipio mediante a realización de rozas, limpezas e novas plantacións coma a que se está a realizar na Mina Mercedes. Estanse a incorporar novos exemplares e especies á plantación de froiteiras iniciada o ano pasado para completala e repoñer algunha das árbores que non arraigaron. Elixíronse para iso amendoeiras, abeleiras e nogueiras. En total, oito plantas ás que se engadirán vinte dous exemplares de madreselva.
A maior parte delas estanse a plantar aos pés da pérgola de madeira que se instalou fai uns meses para que, cando medren, fagan sombra sobre as mesas e bancos. Esta especie con flores de varias cores cumpre, ademais, outra función, xa que repele aos insectos e tan só permite a polinización de bolboretas. As madreselvas tamén se plantarán xunto a randeeira colocada fronte á lagoa, coas mesmas funcións: ornamental e crear sombra neste espazo natural e de lecer.
«Debido a que o chan da Mina Mercedes está compactado debido aos recheos e é moi inorgánico, para facer os buratos para a plantación empregouse unha barrena manual para chegar máis fondo e poder aportar maior cantidade de terra vexetal e substrato, co obxectivo de que as plantas conten con mellores condicións para arraigar. En todas elas se colocaron, ademais, titores para que medren rectas e protectores antifauna», segundo informa o Concello de Valga.