Despois de presentarse nos showcookings, o lalinense volverá aos fogóns o sábado 30 no parque Irmáns Dios Mosquera
28 ago 2025 . Actualizado a las 05:00 h.Os meses pasan moi rápido e máis cun bo sabor de boca, e Valga o sabe. Como xa é tradición, o agosto valgués é un Agosto Gastronómico que ten gusto a anguía e caña do país. Nesta ocasión, o martes 26 foi o día de clausura de última edición. O cociñeiro Álex Iglesias non decepcionou a ninguén dos 30 comensais e trouxo novas creacións para todos os padais.
A última cita do showcooking Universo anguía rematou cunhas preparacións en vivo que se centraba no peixe do Ulla. O produto ecléctico foi a estrela da demostración culinaria que se fixo en diversas sesións. Para os amantes do salgado, a anguía brillou acompañada de diferentes ingredientes demostrando as posibilidades do peixe. Como presaxio dun bo comezo, Iglesias describiu a técnica de afumar en dous estilos: tradicional —cun fumeiro con leña de carballo e loureiro ou romeu— ou, a moderna, cunha pota vella e un coadoiro metálico. Á anguía fumada sobre arroz cremoso de queixo da Denominación de Orixe Protexida (DOP) seguiulle outra ao natural nunha elaboración de tacos ao estilo asiático.
A caña do país tamén tivo un espazo privilexiado ao maridar un prato ao forno, bañando o peixe con augardente tostada. Como broche de ouro, o final representou unha sorpresa para os asistentes, especialmente aos que lles predomina o seu padal doce. Seguindo coa demostración e reunindo produtos galegos con selo de calidade, chegaron empanadiñas típicas da cociña coreana: da man do Mel de Galicia Iglesias introduciu a anguía tanto afumada como caramelizada e un recheo que incorporaba azucre moreno, canela e noces picadas.
Quen desexe degustar as creacións do cociñeiro lalinense en Valga ten que reservarse o día sábado 30, porque Iglesias volverá a presentarse detrás dos fogóns, sendo o encargado de elaborar catro tapas. No día grande da XXXV Festa da Anguía e Mostra da Caña do País, o parque Irmáns Dios Mosquera convértese en destino gastronómico.