Os representantes arousáns na División de Honra estrean o seu casilleiro de triunfos na nova tempada
20 oct 2015 . Actualizado a las 05:05 h.O Establecimientos Otero e o Liceo Casino de Vilagarcía selaron o pasado sábado a súa primeira vitoria na Liga 2015/16 da División de Honra, a categoría de prata do tenis de mesa español. Fixérono ademais a costa da mesma vítima, un Irún Leka Enea que tan só foi quen de sacar algo positivo da súa visita a Galicia a costa do Monteporreiro, en partido matutino dominical con 2-4 final.
O Liceo foi o primeiro en medirse ao Irún, na mañá do sábado, sen darlle opción ao seu rival, endosándolle un 5-1 que só puido maquillar Daniel Palacios no derradeiro choque ante Carlos Domínguez. Antes Sergei Nigeruk abrira o duelo superando 3-0 a Endika González, dando paso a sendas alegrías arousáns nos emparellamentos Domínguez-Santamarta (3-2), Andrés Correa-Palacios (3-2), Nigeruk-Santamarta (3-0) e Correa-González (3-1).
Xa pola tarde, o E. Otero venceu 4-2 o Irún pese ao pinchazo de saída de Julio Reyes con Palacios (0-3). Fernando Padín (3-1) e Guillermo Sánchez (3-0) poñían o 2-1 a costa de Santamarta e de González. Palacios reestableceu a igualada cun 0-3 sobre Padín, pero Reyes (3-2) e Sánchez (3-1) sentenciaron fronte a González e a Santamarta.