O Cambados TM queda fóra da fase, e o Vilagarcía di adeus con derrota
VILAGARCÍA DE AROUSA
O triunfo do A.D. Collado Mediano onte sobre o C.D. Tenis de Mesa Rivas fai intranscendente o partido desta mañá do equipo cambadés en Oroso
22 abr 2018 . Actualizado a las 05:00 h.Negra xornada a de onte para o tenis de mesa arousán, que converte en intrascendente o que esta mañá, a partir das dez e media, faga o Cambados T.M. no local de xogo do Oroso T.M. E é que ao gañar onte o A.D. Collado Mediano o seu derradeiro partido de Liga da División de Honra na casa do C.D. Tenis de Mesa Rivas, 2-4, o equipo arousán non ten opcións de arrebatarlle ao Collado Mediano a terceira e última praza con dereito a disputar a vindeira fase de ascenso á Superdivisión, polo average a prol do conxunto madrileño.
Pola súa banda, o Vilagarcía Cocinas Bulthaup pechou a súa sobresaínte tempada de debú na Superdivisión cunha derrota por 4-2 no local de xogo do C.E.R. L’Escala. Con este resultado remata sétimo con 18 puntos de 44 posibles.