O Cortegada endósalle ao GEIEG o seu segundo impago como caseiro de Girona e hoxe recibe o ADBA
VILAGARCÍA DE AROUSA
![O Cortegada volve xogar hoxe, en Fontecarmoa 2, tras facelo onte en Girona](https://img.lavdg.com/sc/X_gd3Si7pHbK4ku5yDcm6Ozt83E=/480x/2024/01/13/00121705182121844933571/Foto/A_20231216_205633001.jpg)
Ángela Coello foi a mellor do partido, secundada por Diaw no rebote e por Loven na anotación
14 ene 2024 . Actualizado a las 05:00 h.Vitoria de moito mérito a asinada a primeira hora da tarde de onte polo Mariscos Antón Cortegada na cancha do GEIEG de Girona. Un triunfo por 56-64 que converte o cadro vilagarcián no segundo en conseguir derrotar o conxunto catalán na súa pista esta temporada, sumándose ao Maristas Coruña.
O encontro seguiu ao pé da letra o argumento previsto polo adestrador do Cortegada na véspera. O GEIEG tirou dunha defensa pegañenta, con moito contacto, impoñendo desde o primeiro minuto un ritmo de xogo moi alto que nun primeiro momento lles custou seguir ás de Álvaro Fernández. Con todo, o Cortegada foi quen de manterse sempre no choque, sen a penas concesións a un rival que non puido dispoñer nunca de máis ca un fato de puntos de vantaxe.
Amparado na anotación de Lauren Loven, con 26 puntos, e dunha Ángela Coello convertida en MVP da xornada con 18 puntos, 14 rebotes, 5 faltas recibidas e 26 créditos de valoración, o equipo galego agardou a súa oportunidade. E esta rematou chegando no derradeiro cuarto. Cun parcial de 0-11, as de Fernández puxéronse dez arriba a 2,28 do final, 49-59, dominando o desenlace con mestría. En gran medida, grazas ao dominio imperial que demostraron ao longo do partido na guerra polo rebote, que o Cortegada gañou por goleada: 46 capturas fronte ás 28 do seu rival catalán, con 30 entre Coello e Diaw.
«Hemos bajado al barro y sobrevivido», declaraba ao termo do duelo un visiblemente feliz Álvaro Fernández antes de amosar a súa preocupación pola resistencia física das súas pupilas de cara ao partido desta tarde en Fontecarmoa 2 co ADBA (17 horas), logo de voar onte a última hora da tarde de volta a Vilagarcía.
FICHA DO PARTIDO:
GEIEG (56): Melero (2), Pairo (7), Morente, Talasimov (11) e Vanessa González (12) —quinteto titular—; Jodar (5), Alba Coma (9), Fernández (3), Mitjanas (2), Riera (5) e Pérez.
MARISCOS ANTÓN CORTEGADA (64): Blanca Manivesa (7), Lauren Loven (26), Stojanovska (4), Ángela Coello (18) y Absatou Diaw (4) —quinteto titular—; Benítez, Lorena Castro, Sanmartín, Irene Losada (2) e Arambarri (3).
PARCIAIS (E MARCADOR) CADA CUARTO: 14-10, 15-16 (29-26 ao descanso); 14-14 (43-40) e 13-24 (56-64).
ÁRBITROS E PERSOAIS: Marc Alguero e Isaac García. Sinaláronlle 23 faltas ao GEIEG por 18 ao Mariscos Antón Cortegada. Eliminaron por cinco persoais a xogadora local Vanessa González e a visitante Blanca Manivesa.