El Hospital do Salnés recibe un arco cirúrxico e renova o acreditación de apoio á lactancia

O Hospital Público de O Salnés incorporou un sistema de arco cirúrxico deseñado para permitir realizar intervencións con maior nivel de eficacia, ao incrementar a precisión e a seguridade nos procesos, segundo informa o Sergas. Este arco empregarase nos tratamentos cirúrxicos de diversas patoloxías, aínda que o servizo de Traumatoloxía do Hospital do Salnés será un dos máis beneficiados, xa que facilita intervencións coma as cirurxías de columna e permite unha mellor visualización intraoperatoria.

Trátase dun dispositivo portátil, de fácil manexo e deseñado para o traballo en quirófano, que facilita ao persoal sanitario do centro hospitalario de Ande obter imaxes radiolóxicas en ultra alta definición e en tempo real. «Dito avance tecnolóxico na área cirúrxica do Hospital arousán reducirá os tempos das operacións á vez que aumentará a seguridade para os pacientes e para os propios equipos de especialistas», informan as mesmas fontes.

Este novo arco cirúrxico dispón dun tubo de raios, un panel detector plano e un monitor de imaxe no que o equipo cirúrxico pode identificar as estruturas anatómicas, a posición de implantes, materiais cirúrxicos, instrumentos e dispositivos médicos durante a intervención. Deste xeito permite diagnosticar ou tratar patoloxías con técnicas minimamente invasivas, que substitúen procedementos cirúrxicos convencionais obtendo resultados similares.

Ademais, o novo arco cirúrxico para o Hospital do Salnés permite almacenar as imaxes na historia clínica dos pacientes para consultas posteriores, evitando ter que efectuar novas probas de imaxe para controis de cirurxía. Ditas imaxes tamén serven para a estimación da dose de radiación necesaria en cada operación.

O xerente da Área Sanitaria de Pontevedra-O Salnés, José Flores Arias, acompañado da directora do Distrito Sanitario arousán, Nuria Iglesias Álvarez e do director de Recursos Económicos, Vicente García Fernández, xunto con profesionais da área cirúrxica, asistiron no centro hospitalario de Ande á posta en marcha desta aparataxe.

Por outra banda, o Hospital do Salnés recibiu este xoves en Madrid na sede do Ministerio de Sanidade a súa renovación da acreditación IHAN, co que a Organización Mundial da Saúde e UNICEF refrendan ao centro coma único centro sanitario de referencia en Galicia na humanización da atención ao nacemento e a lactancia.

---

---

---