Se alguén non coñece o río Pedras ao seu paso pola parroquia de Posmarcos, na Pobra, que non demore a visita. Quedará marabillado coa beleza de Entrerríos: exaltación de granito e auga entre fervenzas e bosques, entre muíños e cepas de albariño. Un pouco máis cara ao mar, os nomes Crocha de Levante e Crocha de *Poniente, e o castro Croa de Posmarcos, non poden agochar a súa sonoridade case onomatopeica de pedra . A raíz prelatina *k-r volta aquí a darnos a certeza de que un río chamado Pedras non pode por menos que choutar entre bolos e deixar nas súas marxes milleiros de croios ou coios. En canto a Levante e Poñente, significan o leste e o oeste, puntos cardinais solares, ou ventos nomeados polas xentes mariñeiras afeitas a orientarse no mar e na terra. Entre saltos, pozas e vixías mariños, o Pedras descende, altivo e pedregoso, deixando un halo de beleza.