Santiago Cruz: «Mellorar a rendibilidade dos nosos mariscadores é a nosa preocupación»

O covid-19, a toxina e o comportamento dos prezos son as preocupacións


ribeira / la voz

Santiago Cruz Martínez (Noia, 1961) é un dos patróns maiores máis veteranos da comarca. Asumiu o cargo hai case vinte anos e segue ao pé do canón preparando unha nova campaña marisqueira que arranca mañá, pero que é unha das máis incertas debido á situación especial polo coronavirus. Aínda así, confía en que sexa boa para os intereses dos produtores, pois dela dependen centos de familias da zona.

-Como se presenta a campaña deste ano?

-Dende o pósito esperamos que sexa boa, sempre e cando o covid-19 e as toxinas nos deixen traballar. Nesta ocasión dependemos destes condicionantes e tamén dos prezos, pois descoñecemos como vai responder o mercado, aínda que somos optimistas. O problema que tivemos é que o ano pasado non houbo apenas desove e polo tanto non hai tanto marisco como en edicións anteriores. Hai moita cría e esperemos que polo menos se poida comercializar en decembro, pois está medrando moi ben.

-Iso quere dicir que non haberá cifras espectaculares?

-Non teremos os resultados doutras edicións. Este ano haberá a metade de berberecho que na campaña pasada. Ademais do desove, o inverno pasado houbo riadas fortes que provocaron a morte de moito berberecho e ameixa babosa. O berberecho que hai nas concesións é máis pequeno, pero o importante é que se ve moito marisco pequeno e se hai desove, hai futuro. Por iso somos optimistas.

-Canta xente poderá participar este ano?

-Máis ou menos, uns 1.500 produtores, incluídos os que veñen das confrarías de Muros, Porto do Son e Portosín.

-Como están os bancos?

-Agora mesmo están en perfecto estado, pero para deixalos en condicións tivemos que traballar moito, porque nos últimos meses estivemos sacando toneladas de argazos e depredadores que mataban o marisco. Agora están cheos de cría.

-Abrirán todas as concesións?

-Deixamos pechado un dos bancos máis importantes das nosas concesións, como é A Misela. Apenas ten bivalvo para comercializar, pero si moita cría. Se todo vai ben, esperamos que se poida coller en novembro ou decembro.

-Que espera desta campaña?

-Pois que sexa todo o boa posible, pero xa sabemos que será inferior a outros anos. Algunha xente vaise queixar porque haberá menos marisco. Os produtores teñen que mentalizarse de que estas cousas poden pasar e uns anos son mellores que outros.

-A confraría de Noia é unha das empresas máis importantes da comarca polo número de mariscadores e traballadores que ten todos os anos...

-Efectivamente. Uns 1.500 produtores traballan nas nosas concesións e ademais na campaña contratamos a máis de cen persoas para dar servizo ás lonxas e para os labores de apoio.

-Cales son os obxectivos para este ano?

-Polo menos, poder manter os topes actuais ata decembro. Iso quere dicir que teriamos marisco nas nosas concesións e despois xa vén o que está a medrar agora. Mellorar a rendibilidade dos nosos mariscadores é a nosa preocupación e niso estamos centrados os dirixentes.

O berberecho de Noia é garantía de calidade. É un bivalvo moi apreciado tanto polo sector conserveiro como pola restauración e ten un público incondicional.

-Como está o mercado?

-Estes días enviámoslle mostras ás empresas conserveiras, pois están moi interesadas no noso produto. Esperamos que haxa moita demanda, xa que nos dixeron que precisan bivalvo para as súas factorías.

-Como leva estar á fronte da confraría durante tantos anos?

-É difícil, pois hai que aguantar moito. Sempre temos críticas e queima moito, pero estou contento coa xestión que estamos a facer. Chegamos hai case vinte anos e tiñamos unha débeda duns 1.500 millóns de pesetas, uns nove millóns de euros. Agora mesmo temos un superávit de 700.000 euros, polo que me parece que o estamos a facer ben.

-Pode vivir un mariscador desta actividade?

-Creo que si. Non de superluxo, pero cada un pode sacar de media unha nómina mensual de 1.400 euros en medio ano e pódese dedicar a outras cousas tamén.

-Que precisa o sector?

-Os produtores teñen que ser máis profesionais e respectar os topes e a cría. Teñen que mentalizarse de que as nosas concesións son viveiros naturais dos que vivimos moita xente.

A xente está expectante debido aos problemas que está a causar o coronavirus na sociedade e que repercuten directamente na actividade empresarial. O marisqueo non é alleo a esta situación e dende a confraría noiesa confían en que non lles cause ningún contratempo.

-Foi difícil adaptarse ás novas condicións impostas polas autoridades sanitarias?

-Nós estamos a seguir os protocolos establecidos. Non queremos que pase nada e para iso adoptamos todas as medidas posibles que están na nosa man. Dende a toma de temperatura ata o uso obrigatorio de máscaras ou as distancias de seguridade. Se algún ten febre xa non vai entrar nas lonxas. Investimos moitos cartos este ano para evitar contratempos.

-Como cre que van responder os mariscadores?

-Espero que a xente cumpra os protocolos, pois para iso somos profesionais. O covid-19 preocúpanos porque somos un colectivo amplo e moi disperso. Os produtores teñen que ser responsables e dende a confraría pedímoslle que teñan moito coidado. A ver se non hai ningún afectado, pois xogámonos a campaña. Todos temos que cumprir os requisitos e facerlle caso ás indicacións dos traballadores do pósito. Precisamos que todo vaia moi ben.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Santiago Cruz: «Mellorar a rendibilidade dos nosos mariscadores é a nosa preocupación»