Nestes días que se está a celebrar o Día das Librarías, hanme deixar que empece este artigo cunhas curtas liñas do meu libro Veroto el Romano, na súa primeira edición do 2012: «... Pintavio y Veroto, se encaminan hacia el sur bordeando la ladera de la sierra de Barbanza, para luego adentrarse por la vertiente oriental del castro de A Cidade, dada la inaccesibilidad del lugar por su parte occidental (…) Llegaron a las inmediaciones del castro, situado en una alta colina desde la que se divisaban las rías del sur en que vivían los cilenos, los helenos y los grovios; y por el norte, desde allí, se alcanzaba a ver los dominios de los supertamaricos (…) Aquella citania, mayor que la de Baroña y con capacidad para albergar unas trescientas personas, estaba…»
E a que ven esta introdución? -preguntaranse-. Para vender o meu libro?, pois tamén. O caso é que na presentación da obra, que tivo lugar en Ribeira, nun abarrotado auditorio, tiven a honra de contar coa participación do editor, Teófilo, coa do afamado escritor Alfredo Conde e a do alcalde Manolo Ruiz. E lembro que na miña breve disertación falando do porque dunha novela histórica que recuperase a vida e costumes dos nosos primixenios, os castrexos, soltei un reto dirixido ao noso alcalde, no que lle pedía a imprescindible recuperación do castro da Cidade. Como dicía, iso foi no ano 2012 e, dous anos máis tarde, puiden ver con satisfacción que comezaban os traballos arqueolóxicos que facían aflorar e sacar á luz os restos milenarios dun castro en moi bo estado, a pesares da súa destrución parcial; máis atribuíble a descoñecemento e incultura que a actos de vandalismo ou interese na busca dos tesouros dos chamados mouros, tan ben lembrados por Vicente Risco.
E xa ven vostedes: un libro, un dos moitos que ocupan a librarías, foi quen de espertar o interese por unha importantísima actuación arqueolóxica que prestixia e, sen dúbida, prestixiará aínda máis ao noso Concello. Vaian por diante os meus parabéns a esta actuación que se pretende, coa subvención Leader do PDR de Galicia.