A última obra do docente, «A petición de Auli», inspírase na obra de Cervantes
17 may 2023 . Actualizado a las 05:00 h.Existen certas obras que, convertidas en clásicos da literatura, deixan pegada en cada un dos seus lectores, influíndo de xeito consciente ou non nas creacións daqueles que, nalgún momento, se viron atrapados polas súas historias.
É por iso polo que, cando eses apaixonados da literatura comezan a escribir as súas propias obras, a construír as súas personaxes, é inevitable que, dalgún xeito ou outro, todas as influencias consumidas ao longo de tantos anos de novelas e outros xéneros se poidan deixar ver, timidamente, para aqueles que saiban ler entre liñas.
É o caso de Ramón Torrado, escritor rianxeiro, e o seu último traballo, A petición de Auli, que conta con claras influencias dunha obra tan transcendental coma o Don Quijote de la Mancha, libro que sempre lle fascinou: «Trátase das aventuras dun home maior, de 50 anos, e un neno de 11. Deciden facer unha viaxe por Galicia, aínda que nunca se faga referencia ao nome do lugar, e vanse atopando coa vida e os seus golpes».
Influencias
Sobre as influencias que recibe do clásico de Cervantes, o rianxeiro admite que as historias teñen moito que ver: «Hai un episodio, por exemplo, que trata do mesmo, de defender a unha persoa aínda que non o agradeza. O que me gusta do Quijote non son as aventuras con muíños ou os enfrontamentos entre cabaleiros, senón cando están tendo conversas como amigos, á noite, comendo queixo. Esas son as situacións nas que me inspirei, ese tipo de charlas nocturnas e de gran profundidade».
En canto a cal é a historia detrás destas dúas personaxes, Ramón Torrado indica que se trata dunha viaxe que deciden emprender inocentemente, ata que as voltas da vida golpean o seu rumbo: «O maior quere que o rapaz o acompañe durante o verán, nun tempo libre de clases, para ver como están xuntos e co resto da sociedade, aínda que levan golpes tremendos, especialmente para o neno, que aínda é moi inocente».
A obra, que foi presentada no seu Rianxo natal nun íntimo acto no que estivo acompañado do alcalde, Adolfo Muíños, tivo unha excelente acollida entre os seus primeiros lectores: «Foi unha vivencia moi bonita e levei a sorpresa de que o filósofo Ignacio Castro Rey lera o libro con atención. Foi quen de atopar un gran número de significados ocultos e moito do que eu pretendía transmitir. Ademais, a profesora Manuela Palacios sinalou que lle foi collendo moito agarimo ás personaxes, e iso é algo que me encantou oír, é o que pretende calquera autor».
Raio de esperanza
Sobre o ton co que está escrito A petición de Auli, o certo é que, admite Torrado, se trata dunha historia triste: «O libro ten un ton tráxico, pero as personaxes tratan de buscar, de todos os xeitos posibles, a esperanza, que non se descubrirá ata case o final da historia».
No que se refire aos comezos de Torrado no mundo da literatura, o rianxeiro empezou a amosar unha fonda interese polas letras dende o inicio dos seus estudos: «Sempre me gustou ir a clase, e os mestres foron dándome boas notas en redacción. O meu profesor favorito en Estados Unidos, onde estudei durante oito anos, foi moi influínte e unha gran axuda para poñerme a escribir pola miña conta».
Desde aquel momento, Torrado comezaría a crear obras, aínda que non sería sinxelo chegar ata a súa primeira publicación: «Levo escritos bastantes libros. Empecei no ano 1996, pero non tiven sorte coas editoriais ata o 2016, coa miña primeira novela, Rebeca no val das sombras ardentes».
A partir de aí, Ramón Torrado lanzaría unha serie de obras ao público, pero aínda conta cun par de recursos na recámara, agardando ao momento axeitado para que saian á luz: «Teño dúas coleccións de relatos sen publicar, unha historia de cando estiven vivindo en Estados Unidos e unha biografía novelada de Rosalía de Castro».
Mentres tanto, o rianxeiro continúa compaxinando a súa «máxima afección» co seu rol profesional como profesor de inglés.