Soño con ese día no que o das artes sexa tan coñecido como o das letras
01 abr 2025 . Actualizado a las 05:00 h.O día primeiro de abril celebramos o Día das Artes Galegas, e vímolo facendo dende hai unha década. Homenaxéase cada ano a un persoeiro que destacara neste campo, polo que ata agora foron designados pola Real Academia das Belas Artes (Ragba) xente como Castelao, o mestre Mateo, Maruxa Mallo, Alejandro de la Sota, Luís Seoane, Domingo de Andrade, Laxeiro, Martín Codax, Francisco Asorey e Isaac Díaz Pardo, ao que lle renderemos o presente ano 2025. Dous arquitectos, un mestre de obras, un trobador, tres pintores e un escultor, todos eles bandeira do galeguismo artístico.
A Ragba escolleu o día 1 de abril pola efeméride do episodio do ano 1188, que versa na epígrafe dos linteis do Pórtico da Gloria, por ser o día no que se colocou a primeira pedra desta xoia, por dicilo de xeito rápido e que entenda a xente.
Con todo, e como arquitecto que son, quero reclamar que esta data vaia sendo máis posta en valor ata chegar ao rango que ten o Día das Letras Galegas, que ata é festivo en Galicia. Non son menos importantes as artes que as letras. Galicia é moito máis artística do que literaria, e a nosa identidade susténtase na creación artística dos nosos devanceiros, que non necesariamente foron todos eles artistas senón construtores de emocións, pedras que falan porque os seus autores soñaron sempre coa grandeza deste pobo, primeiro reino de Europa tralos romanos.
Soño con ese día no que o das artes sexa tan coñecido como o das letras, aínda que na sociedade actual o que busca a xente é un festivo para fuxir da rutina e saír de viaxe, e non reflexionar sobre o legado que temos.