Organizacións políticas e sociais conmemoraron o nacemento do rianxeiro
03 feb 2020 . Actualizado a las 20:31 h.O Partido Galeguista (PG) demostrou unha extraordinaria capacidade de convocatoria porque foi quen de xuntar onte en Rianxo a máis de vinte entidades e organizacións políticas con motivo do 134 aniversario do nacemento de Daniel Rodríguez Castelao, o galego máis universal, o primeiro presidente de Galicia, como se constataba nunha frase remarcada no cartel anunciador. E a xornada non foi só de celebración, senón tamén de reivindicación a prol dunha Galicia ao mesmo nivel que Cataluña e o País Vasco, polo que xurdiu unha arenga de unidade política para conseguilo, apelando á memoria do autor de Sempre en Galiza e a histórica revista da que foi o máximo impulsor, Nós, que este ano cúmprese o centenario da súa primeira publicación.
Paseniño foron intervindo preto de vinte persoas, incluído o alcalde, Adolfo Muíños, que deu a benvida ao numeroso público que abarrotaba o salón nobre da casa do concello, especialmente a Amalia Bóveda, filla de Alexandre Bóveda, ao que non coñeceu porque súa nai estaba embarazada dela cando foi asasinado; e a Teresa, que coidou ás irmás de Castelao durante corenta anos e que recibiron con emoción as mostras de cariño.
Ao longo dos discursos houbo mensaxes transversais e un sobresaíu entre todos: unha chamada á unidade de acción para conseguir que Galicia non volva a quedar excluída dos cambios que, segundo conclusión unánime, vanse producir en España.
Previamente, Francisco López, Chesqui, subliñou que o Partido Galeguista, do que é secretario xeral, séntese en Rianxo como na súa casa, motivo polo cal cada ano convoca este acto de «reafirmación da universal identidade galega» e lembrou que este sentimento vén de lonxe porque Ramón Martínez López, que fora presidente da formación, decidira que o partido non podía presentar candidaturas en Boiro -onde nacera- nin en Rianxo, por seren «as nosas casas».
Tanto Chesqui como Xesús Suárez, presidente do Partido Galeguista, apelaron á resposta que atoparon en todas as organizacións asistentes para tratar de cambiar o rumbo político en Galicia.
Pluralidade
Os que foron intervindo destacaron, entre outras cousas, que por primeira vez en moito tempo pode haber cambios no Estado e en Galicia, e é necesario organizarse e xuntarse arredor dun obxectivo común, que recoñeza a pluralidade e os aspectos diferenciadores galegos.
A figura de Castelao, que preside a estancia na que se celebrou o encontro, foi a referencia da maior parte das manifestacións que se foron facendo públicas, entre elas, a do presidente da Fundación Castelao, Davide Otero, que proclamou, dirixíndose ao rianxeiro «ti non estás morto, porque non existe a morte, pero si o esquecemento. E nós non te esquecemos».
Tamén aludiu ás ensinanzas de Castelao en Sempre en Galiza ou Cousas Goretti Sanmartín, das que proclamou a súa vixencia; mentes que Luís Villares reivindicou a irmandade, o autogoberno e o legado de Daniel Rodríguez, do que dixo, que, se escribise hoxe Os dous de sempre, serían As dúas de sempre, nun chisco á igualdade de xénero.