«Confírmase o vello adaxio de que vivir é resistir e resistir é adaptarse ó cambio»
20 ago 2025 . Actualizado a las 05:00 h.O costume, non inveterado, de que os alcaldes acudan a visitar as familias nas que algún dos seus membros cumpriron cen anos é nova. É seguro que se tomou daquela outra da posguerra española na que os alcaldes franquistas vestidos coa uniformidade da Falanxe e das JONS visitaban no hospital á nai de familia numerosa, quen acababa de dar a luz, para entregarlle un ramo de flores e un cheque, só nalgúns casos, para os cueiros do bebé que acababa de aterrar neste mundo. Neste caso, o réxime visualizaba a importancia de traer seres ó mundo, despois de exterminalos sen ningún sinal de cristiandade.
No caso dos nosos edís do século XXI, netos ou bisnetos dos actuais centenarios e centenarias, asisten ao domicilio dos celebrados para testemuñar a resistencia daqueles que, pasando todo tipo de penalidades, aguantaron vivos ata chegar aos nosos días. Sen dúbida, grande proeza, pois pasaron épocas de fame, guerras, naufraxios e enfermidades, sen contar co apoio dunha sanidade pública ou dunha educación universal.
Confírmase o vello adaxio de que vivir é resistir e resistir é adaptarse ó cambio. E aí as corporacións municipais, desgraciadamente, non teñen mérito ningún, máis ben o contrario, ao controlaren a vida dos veciños con máis cargas impositivas sen que se observe beneficio algún.
As comarcas de Muros-Noia e Barbanza, segundo o Instituto Nacional de Estatística no 2023, contan con máis de cen centenarios, sendo Noia e Ribeira as poboacións mellor nutridas. Moitas visitas que realizar. Moitas fotos que sacar.