Ferrero afirma ser seguidor do teatro e pensa acudir a todas as representacións que poida
04 oct 2009 . Actualizado a las 02:00 h.El xa ten vivido moitas edicións deste festival de teatro carballés, tantos como leva existindo. No entanto, como rexedor de Carballo, Evencio Ferrero, do BNG, ten agora un importante papel de apoio ao FIOT, unha iniciativa que considera moi loable e xa referente no teatro galego. Ao mesmo tempo, recorda os seus pasos nese mundo e valora moi positivamente a cultura teatral que hai na Costa da Morte.
-¿Como vive o alcalde de Carballo esta xa 18 edición da cita máis teatral que ten o seu concello?
-Ano tras ano vexo como se foron cumprindo as expectativas e hoxe o FIOT de Carballo é un punto de encontro obrigado na temporada de outono. Telón e Aparte, así como todos os demais colaboradores, souberon entrar con éxito nos circuítos teatrais. Coñezo o festival dende as súas orixes e podo dicir que se foi consolidando ata conseguir facer de Carballo unha referencia no teatro en Galicia.
-¿Asistirá ás representacións?
-Dende logo que procurarei asistir ás que poida e espero que sexan a maioría. De feito, así o fixen ata o de agora.
-¿Parte con algunha obra favorita?
-Cada proxecto teatral é diferente e non podo dicir que sinta predilección por unha ou outra, aínda que por suposto, hai compañías que xa teñen unha traxectoria como é o caso de Teatro Corsario. Non obstante, tamén me gusta ver as novas propostas e, loxicamente, Lola Herrera é unha proposta de moito nome.
-Tamén vostede tivo as súas aparicións enriba dun escenario.
-Iso remóntase aos inicios dos anos 70, cun grupo de teatro dirixido por Jesús Rodríguez Carracedo, xa falecido e no que tamén estaba Manuel Rodríguez Caamaño, que hoxe tampouco está xa con nós. Eramos seis actores que puxemos en práctica varias obras tremendamente difíciles e rompedoras naquel momento, como Escuadras de la muerte ou, posteriormente, o Sócrates de Llovet, cunha posta en escena moi coidada.
-¿Segue sendo seguidor do teatro?
-Considérome asiduo espectador, sobre todo ao programa que nese sentido se ofrece aquí en Carballo. É máis, o mellor de todo é que aquí hai un público fiel ao teatro, unha cultura teatral en conxunto que resulta moi positiva. E non só na Costa da Morte hai seguidores senón tamén moi bos actores e directores, como poden ser o propio Artur Trillo, Vicente Mohedano ou Nancho Novo. Parécenme bos exemplos do alto nivel que temos na comarca. Tamén hai que destacar nesa liña, por exemplo, a posta en marcha en Carballo dun taller de teatro.
-¿Por que se abandonaron aqueles proxectos se acadaban tanto éxito?
-O noso era un grupo de amigos, basicamente teatro afeccionado e logo cada un continuou cos seus estudos. As circunstancias foron cambiando e aquel proxecto non tivo continuidade.
-Entra na escena, a continuación, Telón e Aparte. ¿Que papel xoga agora na cultural teatral de Carballo?
-Telón e Aparte foi unha entidade que retomou a actividade teatral en Carballo. Tamén Ártabro, previamente, nacera case que dentro da asociación cultural Lumieira e tivo obras de moito éxito na comarca, como Non lle busques tres pernas ao alcalde e que eu tiven oportunidade de ver e seguir en diferentes ubicacións. Asistín como espectador dese grupo, no que participaba Xosé María de la Viña, tanto en Boiro como en Zas, entre outros lugares. Acabou derivando no que hoxe é Telón e Aparte.
-¿Podemos concluír entón, dado este apoio ao FIOT, que o teatro está por riba das ideoloxías políticas?
-No reparto de papeles, cada un ten que representar o seu e buscar espazos comúns. Teño a confianza posta en que todos procuramos o mellor para Carballo e o FIOT é un bo proxecto. O Concello sempre terá toda a lealdade profesional con el, prestándolle un apoio institucional incondicional a este tipo de proxectos que melloran Carballo.