O escritor ceense Miro Villar presentará mañá o seu novo poemario, As crebas, en Muxía. Dedica as vacacións «a desconectar do mundo do ensino, malia a fama que temos os profesores de traballar pouco. Tamén aproveito para ter máis actividade na literatura». Un verán no que, por suposto, hai momentos de diversión. «Gústame viaxar moito e facer rutas polo monte. A vindeira semana vou ir co Seminario de Estudos Comarcais da Costa da Morte a Cornualles». Gústalle «cambiar as rutinas, facer cousas novas, diferentes, que te enchan de outra maneira». E aproveita para tomar notas cando ve algo que lle pode servir de inspiración nunha futura obra. «De aí pode nacer algo».
-Comida e bebida.
-Calquera peixe con calquera cervexa.
-Praia favorita.
-A de Carnota.
-Non sae da casa sen...
-A carteira e un bolígrafo.
-O mellor e o peor do día.
-O mellor é o amencer. O peor, a modorra despois dunha comida copiosa.
-¿Romarías ou verbenas?
-A romaría de San Hadrián de Toba (Cee), a miña parroquia.
-Gasta pista con...
-Non son de bailar, pero gústame o jazz do Festival dos Abrazos, en Compostela. Especialmente Abe Rábade.
-No verán infórmase con...
-Xornais en papel e dixitais.
-A viaxe deste verán.
-Cornualles (Inglaterra).