O armador tramita a súa xubilación e xa desfixo o «Estrella Verde»
10 ene 2012 . Actualizado a las 07:00 h.Evaristo Lareo é patrón maior de Caión desde 1982. Antes xa foi seu pai e o seu avó. A historia non se repetirá porque os seus tres fillos (dúas mulleres e un home) teñen empregos en terra. Lareo Viñas tramita a súa xubilación, pero xa non ten barco. O Estrella Verde, que era da familia desde 1969, foi para o desguace o último día do 2011. Este caionés de 62 anos viviu as crises do Mar Egeo e do Prestige en primera fila. Foi presidente das federacións galega e provincial de confrarías.
-¿Que vai facer agora?
-Non sei, aburrirme.
-¿Pode seguir como patrón maior?
-Terei que facelo porque, de momento, non hai eleccións. Cando Rosa Quintana chegou á Xunta dixo que era mellor que todos os patróns foran nomeados ao mesmo tempo, pero non houbo convocatoria. Nós fixemos as eleccións hai tres anos, pero hai algunhas que levan seis e aínda non se sabe nada.
-¿Vai ser pronto?
-Terá que ser porque as eleccións para a Federación Nacional, que preside Genaro Amigo, van ser en marzo e daquela tería que haber novos patróns maiores e novos presidentes para as federacións. Non tería sentido que saíra na española alguén que despois non fora elixido no seu porto.
-Vostede xa non ten barco, pero aínda non está xubilado?
-O Estrella Verde foi aceptado na última convocatoria e tiña ata febreiro de prazo, pero veu mal tempo de decidín mandalo antes para o desguace.
-¿E a tripulación?
-Eran cinco homes e catro van para o paro. O outro tamén se vai xubilar. Temos que amañar os papeis.
-Agora hai menos xente na confraría, só 26 socios. ¿Ten medo de que desapareza?
-Non pode pasar. Por iso insistimos tanto hai uns anos no cambio da lexislación sobre as confrarías, para que se equipararan neste sentido aos concellos. Agora non ten que haber un mínimo de xente. Haberá confraría mentres haxa un só percebeiro ou pescador.
-A cuestión é se o censo será abondo para os oito membros da xunta xeral que son necesarios.
-De momento hai seis embarcacións, pero a maior parte dos socios son percebeiros.
-O seu cargo está ligado a outras entidades, como o GAC, do que é presidente. ¿Como se vai resolver esa cuestión?
-Aínda non temos falado diso. Aínda vou seguir un tempo porque non está moi claro como hai que facer o relevo. Eu non teño presa ningunha por deixar as cousas. No GAC estamos a facer un moi bo traballo para mellorar a situación na Costa da Morte.
Evaristo Lareo Viñas patrón maior da confraría de caión