Ana Romero, Alba Nogueira e Xosé M. Lema abriron as xornadas do Semescom
24 nov 2012 . Actualizado a las 07:00 h.A orixinalidade, a singularidade e mesmo as contradicións propias da época que lle tocou vivir foron algúns dos elementos presentes durante toda a tarde de onte nas primeiras sesións das xornadas que o Seminario de Estudos Comarcais da Costa da Morte lle dedican ao crego liberal Juan Antonio Posse (1766-1854) na Casa da Cultura vimiancesa.
Ante un auditorio composto maioritariamente por profesores e coa presenza tamén dos alcaldes de Vimianzo, Manuel Antelo (como anfitrión), e de Laxe, Antón Carracedo (como representante do municipio onde naceu Posse), tres expertos volveron ao século XIX para recuperar ao persoeiro e á súa época.
Xosé María Lema, presidente do Semescom, abriu a sesión cun percorrido detallado da traxectoria vital de Posse, desde o seu Laxe natal ata as tres parroquias leonesas nas que exerceu como crego. Da importancia da súa defensa da Constitución de 1812 e do pensamento de Posse, liberal ou incluso colectivista no social, pero conservador no relixioso ocupouse a profesora da Facultade de Dereito Alba Nogueira. Pechou esta rolda a historiadora Ana María Romero Masiá tratando a importancia do movemento liberal coruñés durante a primeira metade do XIX.
Ao remate destas intervencións, abriuse un foro de debate no que o público se interesou por algúns aspectos do pensamento de Posse poñéndoos ademais en relación co momento actual. Así, non faltaron mencións ás polémicas taxas xudiciais impulsadas por Gallardón nin á recente sentenza que anula varios apartados do decreto do galego, un idioma que Posse non empregou nos seus escritos, pero polo que, segundo explicou Nogueira, sentía un gran respecto.
span lang="gl">As xornadas continuarán hoxe con tres novas conferencias e unha visita. Víctor Manuel Castiñeira falará da vida cotiá na época de Posse (10.00), Xosé María Méndez Doménech ocuparase da relación do crego coa familia catalá que trouxo a industria da pesca a Laxe (11.00), e Ramón Mariño Paz abordará o contexto sociolingüístico da época (12.30). Xa pola tarde (16.30) os participantes irán ata Laxe e Soesto para coñecer algúns dos lugares que marcaron a vida de Posse, como a súa casa natal, a igrexa ou a praia.