Os expertos avogan por prestixiar o galego para inverter a perda de falantes
CARBALLO
Carballo acolle o décimo curso de verán sobre normalización da UDC
10 jul 2014 . Actualizado a las 07:00 h.O décimo curso de verán de normalización lingüística da Universidade da Coruña botou onte a andar en Carballo cunha xornada na que ademais de facerse unha radiografía do panorama actual do galego pola perda da transmisión interxeracional -eixo central desta edición- houbo tempo para comezar a albiscar xa algunhas solucións.
Tras o acto inaugural, no que tomaron a palabra o carballés Xosé Ramón Freixeiro Mato, director do curso e do Servizo de Normalización Lingüística da UDC; Rosa Moreiras, secretaria da Coordinadora de Traballadores de Normalización Lingüística; Valentín García, secretario xeral de Política Lingüística; Xosé Luís Armesto, reitor da Universidade da Coruña, e Evencio Ferrero, alcalde de Carballo, deron comezo as primeiras intervencións.
O catedrático de Filoloxía Catalá da Universitat d?Alacant, Brauli Montoya, trazou algúns paralelismos entre a situación que se vive en Valencia e en Galicia e destacou a importancia da escola como elemento para a revernacularización, é dicir, a recuperación de falantes para unha lingua que corre perigo de ser substituída por outra.
Xaquín Loredo, lingüista da RAG, encargouse da diagnose da situación actual do galego e desvelou, botando man dos datos do Mapa Sociolingüístico de Galicia e doutros estudos diversos, que o proceso de abandono do galego é moi acusado entre os mozos de entre 16 e 25 anos das zonas urbanas, con cifras que chegan ata o 43,9 % de cambio de lingua con respecto á que falaban os seus avós. Por contra, sinalou que en termos globais o proceso de regaleguización só afecta a un 1 % da poboación.
Valentina Formoso tomou o seu relevo para pasar da análise cuantitativa á cualitativa e plantexar algunhas preguntas. Entre elas, se o feito de centrar a atención máis en buscar novos galego falantes que en coidar os que xa había non contribuíu a esa perda de transmisión interxeracional. Esta sociolingüista e mestra tirou dalgúns exemplos próximos para denunciar os estereotipos negativos que aínda existen en torno ao galego e avogou por prestixiar o galego, coordinar obxectivos, ser proactivos na súa defensa e «buscar novos discursos para os valores de sempre».