O reitor asegura que nestes 25 anos non lembra outra época de tan pouca autonomía
22 jul 2014 . Actualizado a las 07:00 h.Hai pouco máis de dous anos e medio que colleu as rendas do Reitorado coruñés, pero Xosé Luís Armesto (A Coruña, 1948) leva desde o ano 1989 axudando a construír a institución e moito antes xa dirixía o Colexio Universitario da cidade.
-¿Que significan estes 25 anos?
-Significan unha satisfacción de estar ao fronte da institución cando cumprimos 25 anos, e unha oportunidade para reflexionar, para poñer en valor as cuestións importantes da institución, e para ver o que podemos mellorar e o que podemos promover.
-Historicamente, a UDC estivo por detrás de Santiago e de Vigo en presupostos e infraestruturas.
-Eu defendo, defendín e defenderei o sistema universitario galego. É verdade que temos tres universidades e estamos celebrando este 25 aniversario, pero o importante é fortalecer e promover a cooperación das tres e traballar como sistema universitario galego, que por outra parte, por lei estamos obrigados a elo. Somos un país moi pequeno nun mundo globalizado e temos que traballar conxuntamente. Ese é o camiño que debemos seguir, o de colaborar, cooperar e promover o sistema universitario galego. Se o facemos así, iranos moito mellor.
-¿Solucionarase o problema de Medicina?
-Algún día terá que solucionarse. A solución que poñemos sobre a mesa é a máis adecuada e a máis intelixente, que é colaborar e cooperar, e temos que asinar un convenio coa Universidade de Santiago, para que Vigo e A Coruña poidamos colaborar na docencia do grado de Medicina.
-O Goberno di que a crise estase acabando, pero os recortes seguen vixentes.
-O coherente sería que levantase as restricións, porque estannos afogando, economicamente e coa taxa de reposición para poder renovar o cadro de persoal e incorporar xente nova que aporte novos valores. Non nos deixan, dentro do límite de gasto, ser autónomos, e precisamos unha autorización da Xunta para os contratos temporais. Nestes 25 anos non recordo nunca que houbera esta falta de autonomía universitaria e de financiamento.
-¿Como se presenta o futuro coa caída dos alumnos?
-Estes días publicábanse as notas de corte, que soben en todas as titulacións e en todas as universidades, o que quere dicir que cada vez hai maior interese por ter unha formación cualificada. Eu entendo que a xente nova e as familias teñen claro que estamos na sociedade do coñecemento, e o valor de hoxe e de futuro é o coñecemento.
-Pero o ministro de Educación di que agora hai que pagar a carreira, e custa sobre 9.000 euros.
-Non só hai que convencer ao ministro, senón á sociedade en xeral, do valor da Universidade pública e de que os seus fillos poidan estudar cunhas taxas relativamente baixas. Por iso, foi tan importante a creación da UDC e destes 25 anos, porque aproximou a formación superior aos grandes centros de poboación, como A Coruña e Ferrol.