Mónica Rodríguez, PSOE de Vimianzo: «Poder estar ao carón dos veciños é marabilloso»

A alcaldesa Mónica Rodríguez Ordóñez (Calo, 45 anos) repite candidatura á fronte do PSOE de Vimianzo, e antes, dende o 2011, estivo nunha agrupación independente.

—Estes catro anos gobernos en minoría. Como foi a experiencia?

—Foron catro anos tremendamente difíciles. Ás veces parece que esquecemos axiña, pero tanto o meu equipo como eu non o imos facer tan facilmente. Somos conscientes do difícil que foi, cunha pandemia e todo o demais. Non quero que soe a escusa, pero se reflexionamos hai que ser conscientes dos momentos complexos e de incertidume e medo que vivimos.

—Que queda do bo e do malo?

—Do bo, a experiencia foi difícil, pero magnífica. Poder estar ao carón dos veciños é algo marabilloso, que nunca olvidarei. Con ese compromiso dende o primeiro día de estar con eles, escoitando, con moito diálogo e traballando arreo. É unha satisfacción persoal e espero seguir facéndoo, axudar cada día, buscar solucións, mellorar o Concello ou unha parroquia, os servizos... É moi positivo. Cando me deito e penso que puiden arranxar o día a día, mellorar algún problema, é moi bo. O negativo? Ás veces hai situacións difíciles, e hai que tomar decisións non fáciles. Esa responsabilidade pesa, pero cando un toma a decisión de estar nunha candidatura, sabe o que acarrea, o bo e o negativo. Tamén te atopas con xente que escoita pouco e que debería tender máis a man para construír, priorizar Vimianzo, analizar, e facer propostas. Eu tendo a man, sería bo para todos, é a nosa obriga.

—Que destaca do que se fixo nestes catro anos? E hai algo pendente que lle gustaría sacar adiante?

—Tras catro anos convulsos e difíciles, loxicamente quedou moito sen facer. Este goberno traballou arreo dende o primeiro día, a prol dos veciños. As actuacións de mantemento, en obras e con persoal propio, son visibles. O estado no que eu collín as parroquias era lamentable, cun abandono total e absoluto, e traballamos dende o primeiro día. En licitación e contratación estamos ao día, grazas aos traballadores do Concello, e cando chegamos había un colapso. E tendo en conta a pouca man de obra que hai, a inflación, os custes enerxéticos... E aínda así conseguimos melloras e obras de calidade, nos os vernices que acostumaba a facer nos últimos anos o goberno anterior. Hai moito pendente, como abastecementos, e o meu compromiso é seguir traballado arreo en infraestruturas, servizos sociais, o polígono... Grazas ao IDAE logramos un proxecto moi importante, como foi a substitución deses 4.500 puntos de alumeado para o aforro enerxético. Somos un Concello saneado, aínda que a algún nos lle gusta, e parece que queremos volver atrás, difamando. Sen operación de tesourería, co pulmón económico do Concello, fixemos esta obra. E como isto, moito máis.

---

---

---