Secho, novo adestrador do Bergantiños: «Temos que ter a máxima ambición por ser primeiros»

O novo Bergantiños xa está practicamente listo para comezar a súa pretempada o próximo mércores 26 de xullo. Farao cun novo adestrador aos mandos: José Manuel Martínez Paz, Secho (Porto do Son, 1977). Chega ao banco das Eiroas procedente do Lugo, onde exercía no corpo técnico, ao igual que xa fixera no Deportivo, durante a primeira etapa de Rubén de la Barrera. Si dirixiu ao Noia e a practicamente tódalas categorías de Abegondo. No 2011, en xuvenís, alcanzou a Copa de Campións coa xeración de Insua, Róber Pier ou Luis Fernández.

—Tiña ganas de volver a estar á fronte dun proxecto?

—Si, a verdade e que tiña moitas ganas. Gústame moito adestrar e estar no campo cos xogadores tanto nos adestramentos como nos partidos. É certo que tamén gocei dende a perspectiva de axudante, pero sempre me gustou moito ser primeiro adestrador porque podes levar as túas ideas máis adiante e non dependes tanto doutras persoas.

—Como se deu a fichaxe?

—A ver, o Bergan como o Lugo, non tivo a mellor tempada o ano pasado. Entón comezamos a falar, porque aquí está Darío Cotelo encargándose un pouco da parcela deportiva, que o coñezo ben. Eses contactos comezaron pronto, pero chegou un punto no que xa tiña que decidir e tomei esta decisión de vir para A Coruña, onde vivo, e sumarme a este proxecto tan interesante.

—Pesou a profunda renovación que necesitaba o equipo na toma desa decisión?

—Non, é un aliciente máis, unha oportunidade. Perdes a categoría, pero non hai que pensar máis en iso, senón mirar adiante. Si que se puxo máis difícil logo co ascenso do Vilalbés, porque por proximidade vaiche condicionar á hora de atopar bos xogadores. É un reto ben fermoso este de construír un equipo case de cero, con moitas fichaxes. Teremos que coñecernos ben e pronto para formar un verdadeiro equipo.

—Que papel xogou na configuración do plantel?

—O certo é que hai roles definidos e esa responsabilidade si que lle toca máis a Darío, pero hai conversas en todo momento. Cando elixes ao adestrador xa elixes por onde vas ir, entón si que é un traballo conxunto entre Darío, o club, eu e Subirán —que continuará de segundo adestrador—.

—Que valoración fai do mercado?

—Moi contento con todos os movementos. Ao final moves un número moi amplo de futbolistas e tes que ir xogando cos tempos e tendo paciencia. Pero moitos dos firmados, son xogadores moi contrastados na categoría e reclamados por outros equipos. A xente vai gozar moito con eles e eu tamén véndoos adestrar. Agora o que hai é que establecer esa mentalidade colectiva, que para min é decisiva. Son dos que lle dá moita importancia ao equipo, e non aos xogadores. Se conseguimos iso, estaremos moi preto do que buscamos, o ascenso.

—Para esa unión preocúpalle o feito de ter moitos xogadores novos no equipo?

—Para iso van estar os adestramentos. Sobre todo nos primeiros tocará observar moito e ver un pouco como se relacionan, a fluidez que teñen uns e outros ou saber que nos dan xogando a perna natural, cambiada, con laterais que soben moito... Imos ter que ser un equipo versátil e imos ir probando cousas porque non fixemos unha plantilla cunha formación xa establecida. Fomos vendo que futbolistas ofrecía o mercado. Non me preocupan tanto as aliñacións que podamos desenvolver senón o entendemento de todo iso. Se temos uns principios colectivos claros, seremos máis imprevisibles para os rivais.

—Cantas fichas do primeiro equipo quere ter?

—Sobre vinte, cos sub 23. Condiciona un pouco o feito de non ter filial, pero temos que adaptarnos, non queda outra. Ese espazo abriría que os máis mozos tiveran opcións de competir sen dar tanto salto. A min gústame traballar con eles e axudarlles a crecer, pero a nómina de xogadores vai ser ampla e o obxectivo que temos é moi ambicioso.

—Como vai ser o novo Bergan?

—Creo que un conxunto que se marque un obxectivo como o ascenso non pode especular. Debe mirar de fronte a portería rival e buscar a vitoria dende o inicio en tódolos campos. Ás veces poderase facer máis e outras menos, pero esa é a intención, tratando con respecto aos rivais. Intentaremos ser un Bergan propositivo, que trate de recuperar a pelota o máis pronto posible e que intente levar a iniciativa con balón. Isto é o máis xenérico e dentro diso veremos que matices lle podemos dar a partir de coñecer á xente nos adestramentos.

—O céspede artificial non é o mellor para desenvolver ese xogo.

—Non me preocupo por iso, porque é algo que non podemos cambiar. Agora, que nos gustaría ter un céspede sintético ou natural, pero que axude, por suposto, pero adaptarémonos. Xa o comentei, máis adaptados que nós ao noso campo non vai estar ninguén. Imos mentalizarnos moito e tratar de buscar ás mellores solucións.

—Chegará alguén con vostede para o corpo técnico?

—A ver, xa están aí Darío e Subirán, aos que coñezo dende hai anos, sobre todo ao segundo. E logo, estamos a punto de pechar o preparador físico e o adestrador de porteiros, que xa están avanzados. O clube non me puxo ningún problema en ese sentido.

—Tódolos equipos estanse a mover moito nesta Terceira. Quen lle ten pinta de que vai estar arriba a dous meses de comezar a competición?

—Os que máis soan por mercado son, por suposto, o Arousa e a UD Ourense. Tamén o Bouzas. E hai moitos equipos que van facer moi boa temporada e que quen sabe se poden chegar. O propio Arteixo, Estradense, Celta C... Aquí nunca sabes. O que tes que ter claro é que hai que respectar a categoría. Temos o obxectivo de ascender á Segunda Federación, pero ascéndese en maio. Co cal, do que nos temos que mentalizar este ano é de gozar da Terceira e ter a máxima ambición por ser primeiros, e iso pasa polo día a día, non hai outro segredo.

---

---

---