Trouxeron ao Verán Cultural de Carballo o disco «As catedrais silenciadas». Trouxeron tamén memoria do Xestal, de Consuelo dos Queixos ou dos oleiros de Buño
05 ago 2023 . Actualizado a las 20:14 h.«Sempre dixen e digo que Bergantiños é unha das capitais do folclore galego», reafirmaba Xabier Díaz horas antes do concerto que, xunto coas Adufeiras de Salitre, ofreceu este pasado venres en Carballo. Un concerto incluído no Verán Cultural municipal e posible co apoio da Fundación Luís Calvo. Ateigou a Praza coma se fosen as mellores noites de San Xoán.
«Quizais algún día haxa que pensar en darlle unha dimensión diferente, non sei se un observatorio ou centro, xuntar a cantidade tan importante de arquivos espallados polo país. Foi e é esta unha das bisbarras máis fértiles en acervo cultural», incidía nesas palabras en Radio Voz antes de actuar. Non presentaran aínda neste «porto refuxio» o disco As catedrais silenciadas, e iso fixeron, pero moi conscientes de onde estaban.
Estaban diante das bailas da Escola do Alprende, de par da gaita de David Puñal, lembrando en varias ocasións a loita do oleiros de Buño, honrando a memoria do Xestal ou reivindicando a Consuelo dos Queixos, informante da peza No salón das cereixas, ou Teresa de Feles, ambas xa falecidas. «En Bos Aires, en Glasgow, en Londres ou en Madrid, sempre me acordo delas, e se cadra por iso aínda será máis especial en Carballo», avanzaba Díaz antes de intervir. Para esa memoria anónima da lírica popular pediu e pide el un Día das Letras Galegas, particularmente para as mulleres. Díaz entregouse a Carballo e a Bergantiños, foi feliz na súa casa, e o público respondeu ben. Moi ben.