Cultura e aprendizaxe para tódolos gustos coa Fundación Eduardo Pondal

Un mes despois de cumprir quince anos, a Fundación Eduardo Pondal presenta un programa de actividades para o primeiro semestre do 2024 que non fai máis que confirmar o seu profundo compromiso cos veciños e veciñas de Ponteceso e Bergantiños. «A nosa ilusión é que non quede ninguén sen aprender e que poidamos sacar á xente das súas casas», sinala Xosé María Varela, xerente da entidade. Un obxectivo máis doado de conseguir co volume de ofertas das que dispoñen este ano na Casa da Muller, na que mañá se reinician as actividades. Será un espazo vivo dende luns a sábado e ata o mes de xuño. Os luns, haberá costura, con Teresa Mosqueira, Placeres e Fina Calvo, e informática, con Paula Blanco. Os martes serán para calceta, con Ana Lema, informática e coiro, unha das actividades novas que se introducen e que impartirá Maranxo.

Os mércores será a quenda para a pandeireta, con Lupe Blanco e para o mindfulness, con Teresa Vilanova. Os xoves, toca cociña, con Bautista Mato, e para a poda e enxertos, con Amancio Lavandeira. Os venres, cestería con Teresa Seara; teatro con Yago Espasandín, pirogravado con Ricardo Rico e Tornarratos con Tamara Lema e Sabela Nogueira. E por último, os sábados haberá unha actividade denominada Talento Interxeracional-Patronaxe, con Teresa Mosqueira, Placeres e Fina Calvo, e aulas científico-tecnolóxicas, con Gerardo Reino, Sofía González e Esther Suárez. Ademais, dende a Fundación advirten de que aínda está pendente de confirmar un dos días da semana para consellos médicos con Adriana Suárez e José González. «Somos unha referencia en canto a programas de envellecemento activo», resalta Varela.

Un programa pioneiro

Neste amplo compendio de actividades tamén se estrea un programa pioneiro, que pretende por en valor a cultura mariñeira. Trátase dunha iniciativa financiada polo GALP e na que participan os concellos de A Laracha, Carballo, Malpica, Cabana, Laxe e Camariñas. Trátase de ensalzar a cultura mariñeira a través de espazos singulares, romarías, camiños do mar, os carpinteiros da ribeira, a despensa mariña, as artes ou a lingua mariña.

Por suposto, a Fundación seguirá ensalzando a súa figura principal, cun percorrido polo espazo poético pondaliano nos lugares de Caión, Razo, Nariga, cabo de Santo Hadrián, Sisargas, Esteiro do Anllóns, Laxe e Camariñas durante febreiro e xuño e co apoio do Instituto de Estudos do Territorio. O rescate de coplas e romances legadas por Matilde Castro García, Matilde de Limiñoa, e outra das principais metas nesta primeira metade do 2024, no que haberá presenza de alumnado en prácticas da Facultade de Ciencias da Educación de A Coruña.

---

---

---