Sucédense as presentacións literarias na bisbarra. Silvia Tasende, Lucy Fidalgo, Laura Romero, Alejandro Otero Jamardo...
29 dic 2024 . Actualizado a las 05:00 h.Se os Reis Magos precisan de inspiración, sen dúbida han de atopala na Costa da Morte, canto menos no que a literatura se refire. Semella que moitos son os autores e editoriais que están a aproveitar esta recta final do ano para dar a coñecer as súas novas publicacións, con presentacións e actos divulgativos case a diario.
Onte mesmo, no Casino de Carballo, a autora local Silvia Tasende acompañábase da xornalista Alejandra Mareque para falar da súa primeira novela, O espírito das maceiras. Sobre a mesa, exemplares do libro e, por suposto, unhas cantas mazás.
O venres houbo dobre proposta, pois mentres en Espiral Maior Foro Alejandro Otero Jamardo presentaba a súa novela O cabuchón vermello, na compaña de Juan Carlos Díaz del Valle e Miguel Anxo Fernán Vello; en Vimianzo, Lucy Fidalgo falaba da súa historia de superación mentres daba a coñecer ante os seus veciños Promesas de otra vida.
Santiago Llovo e A salga en Cee e Dumbría, os docentes Fina Paulos e Óscar Rey con Intelixencia artificial para a sociedade, Víctor Cebey co seu poemario Do A ao X ou Laura Romero e A culpa foi de Zënzar foron outros dos relatores dos últimos días na Costa da Morte.