Finalista no certame de Noveis Deseñadores en anteriores edicións, as súas creacións abrirán este ano os desfiles dos concursantes
26 mar 2025 . Actualizado a las 05:00 h.Unha das principais novidades da vindeira edición da Mostra do Encaixe de Camariñas, será a creación dunha nova sección denominada Firmas Emerxentes, que buscará promover e dar apoio a deseñadores que nalgún momento pasaron polo certame que convoca a Mostra e que na actualidade están en proceso de crear a súa propia marca.
O primeiro protagonista será Xoaquín Ruiz, que foi finalista no concurso en varias edicións e que, dende entón, seguiu dando visibilidade ao encaixe camariñán por toda Europa. Os seus deseños abrirán cada un dos desfiles dos Noveis Deseñadores co obxectivo, apunta a concelleira Encarna Liñeiro, de lembrarlles aos participantes que contarán co apoio de Camariñas se seguen apostando e empregando esta artesanía nas súas creacións.
A creación desta nova sección, engade Encarna, é para os deseñadores «unha forma de continuar e promocionar o seu traballo para que consigan consolidar a súa marca».