Ecovoz | Candela Lema fundou Fíos de Cores
31 mar 2025 . Actualizado a las 05:00 h.Aos seus 22 anos, Candela Lema Neira (Corme, Ponteceso) vén de poñer en marcha o seu proxecto Fíos de Cores. Unha tenda online de produtos artesanais confeccionados por ela mesma e, en moitos casos, a partir da reciclaxe de restos de telas, aos que lle da un novo uso a través da técnica do trapillo. «Son materiales que agora se poden atopar en múltiples lugares, o complicado é chegar a certas cores porque as modas van cambiando. Eu, a maioría consígoos a través de internet», explicou Candela no programa de Ecovoz deste venres.
Esta cormelá achegouse á costura e a confección de prendas grazas a súa avoa e a súa nai, pero foi autodidacta durante a maior parte do seu proceso. Agora, recolle os froitos dun proxecto que está acadando resultados e atraendo miradas de distintos puntos de España grazas a súa difusión por redes sociais. Ela está convencida de que a clientela outorga un valor engadido á artesanía e á reciclaxe presente nos seus produtos: «Quedei sorprendida e agradécese porque son produtos que levan moitas horas de traballo detrás e sei que ás veces iso é complicado velo dende fóra». «Estamos nunha era de consumismo máximo, pero ao mesmo tempo creo que estamos abrindo os ollo», conclúe Candela.